Bul týraly «Aqıqat» qoǵamdyq komıssııasynyń tóraıymy Aıman Omarova komıssııanyń biraptalyq jumysyn qorytyndylaý kezinde aıtty, dep habarlaıdy "Adyrna" ulttyq portaly baq.kz-ke silteme jasap.
Onyń aıtýynsha, Almatydaǵy tergeý ızolıatorynda otyrǵan úsh stýdent Azamat Amangeldıev, Azat Ýálı jáne Dastan Jaıylǵanovqa qatysty bultartpaý sharalary ózgertilip, úıqamaqqa aýystyrylǵan.
Olarǵa QR QK-niń 272-babynyń ekinshi bóligi boıynsha aıyp taǵylǵan. Sot olardyń qarý-jaraq tasyǵanyn kórsetetin vıdeolardy alǵa tartty. Alaıda olar májbúrli túrde barǵan. Iaǵnı daıyndalǵan qarýly adamdardyń qorqytýymen 5 qańtarda alańǵa baryp, zańsyz áreketter jasaǵan. Mıtıngke qarýmen qorqytyp aparǵany týraly basqa da adamdar aıtyp jatyr. Sondyqtan biz bul balalarǵa qatysty isti toqtatýdy usynǵan edik, – dedi Aıman Omarova.
Balalardyń aıtýynsha olar beseý bolǵan, bireýin atyp tastaǵan jáne qorqytqan. Maska kıgen qarýly adamdar bir-birimen basqa tilmen sóılesken, sondyqtan olardyń aıtqanyn isteýge týra kelgen.
Komıssııa tóraıymy osy iske nazar aýdaryp, ótinishterine qulaq asqan prokýratýra men ózge de jaýapty adamdarǵa alǵys bildirdi.
Sonymen qatar ol Atyraýda qańtar oqıǵasyna qatysty qamaýda otyrǵan Esjanov Erqanat, Erkebulan Baltabaev, Medet Naryshevqa qatysty bultartpaý sharalary ózgertilip, úıqamaqqa aýystyrylǵanyn jetkizdi.
"Adyrna" ulttyq portaly
