تانىمال ايتىسكەر اقىن، بۇگىندە «الاتاۋ» ءداستۇرلى ونەر تەاترىنىڭ ديرەكتورى قىزمەتىن اتقارىپ جۇرگەن رينات زايتوۆ پرەزيدەنت قاسىم-جومارت توقاەۆتىڭ قازاقستان حالقىنا جولداۋىنا پىكىر ءبىلدىردى دەپ حابارلادى "ادىرنا" پورتالى turkystan.kz سايتىنا سىلتەپ.
«مەملەكەت باسشىسى قاسىم-جومارت كەمەلۇلى توقاەۆ قوس پالاتانىڭ بىرلەسكەن وتىرىسىنا قاتىسىپ، قازاقستان حالقىنا جولداۋىن ارنادى. بۇل جولداۋدى ءبىز اسىعا كۇتتىك، ۇلكەن قوبالجۋمەن تىڭدادىق. سەبەبى، وسى جولى پرەزيدەنت بۇرىنعى ءداستۇردى وزگەرتىپ، ەلدىڭ نەگىزگى باعىت-باعدارىن ايقىنداۋ، جاڭا قازاقستاندى قۇرۋ بويىنشا ناقتى قادامداردى اتادى»، – دەپ باستادى ءسوزىن ول.
ودان ءارى ايتىسكەر پرەزيدەنتتىڭ قاڭتار قاسىرەتى مەن جاڭا وبلىستاردى اشۋعا قاتىستى ويلارىمەن تولىق كەلىسەتىنىن اتاپ ءوتتى.
«قاڭتار وقيعاسى»، ودان كەيىن بولعان ەلىمىزدەگى بىرقاتار كۇتپەگەن جاعدايلار، وسىلاردىڭ بارلىعى ءبىر ءتۇيىندى قاجەت ەتتى. سول ءتۇيىن بۇگىن ايتىلدى دەپ ويلايمىن ءوز باسىم. قازاقستان ازاماتتارىنىڭ دا كوڭىلىنەن شىقتى دەي الامىن. اتاپ ايتاتىن بولسام، ەڭسەسى ءتۇسىپ، ابدەن توزىڭقىراپ قالعان وڭىرلەردىڭ قايتا جاندانۋىنا مۇمكىندىك بەرىپ، اباي، ۇلىتاۋ، جەتىسۋ وبلىستارى اشىلدى. بۇل سوڭى ەمەس بولار. ويتكەنى، بىزدە ءالى دە ونداي ايماقتار بار»، – دەدى ول.
سونىمەن قاتار، ول توقاەۆتىڭ كونستيتۋتسيالىق سوت، ۇلتتىق قۇرىلتاي، ەسەپ كوميتەتىنىڭ ورنىنا جوعارى اۋديتورلىق پالاتا قۇرۋ، ءماسليحات توراعاسى لاۋازىمىن ەنگىزۋ، سايلاۋ زاڭنامالارىنىڭ ساقتالۋىن قاداعالاۋ ءۇشىن بايقاۋشىلاردىڭ قۇقىقتارى مەن جاۋاپكەرشىلىگىن ناقتى بەلگىلەۋ، ماجوريتارلىق سايلاۋ جۇيەسىن قولدانۋ، پرەزيدەنتتىڭ وكىلەتتىك كەزەڭىندە پارتياعا مۇشەلىگىن توقتاتۋ مىندەتىن زاڭنامالىق تۇردە رەسىمدەۋ، اكىمدەر مەن ولاردىڭ ورىنباسارلارىنا پارتيا فيليالدارىندا قىزمەت اتقارۋعا زاڭ جۇزىندە تىيىم سالۋ، بۇقارالىق اقپارات قۇرالدارىنىڭ باسەكەگە قابىلەتتى جانە ەركىن بولۋىنا قاتىستى ۇسىنىستارىنا قولداۋ ءبىلدىردى.
«وسى ۇسىنىستاردىڭ ءبارى ءبىز ءۇشىن ۇلكەن قۋانىش. بارلىعى تەگىس قۇپتارلىق. تاعى ءبىر كوڭىل قۋانتاتىنى، الماتى وبلىسىنىڭ ورتالىعى قاپشاعايعا قوناەۆتىڭ ەسىمىن بەرۋ تۋرالى ايتىلدى. ەگەر تاڭداۋ حالىق جاقتا بولسا، قازىردىڭ وزىندە 80 پايىزى قولدايدى. ءوزىنىڭ باسشىلىق مىسىمەن، پرەزيدەنتتىك وكىلەتتىلىگىمەن وسى جىلدىڭ ورتاسىنا دەيىن جوعارىدا اتالعانداردىڭ ورىندالۋىن تالاپ ەتۋى ءبىز ءۇشىن سەرت بەرگەنمەن بىردەي بولدى. قۇداي بۇيىرتسا، جولداۋ ەشقانداي كەدەرگىسىز ەلىمىزگە وڭتايلى وزگەرىستەر اكەلەدى. سونى كورۋگە جازسىن. جاساسىن، جاڭا قازاقستان! پرەزيدەنت جولداۋىنا العىس بىلدىرەمىز»، – دەدى اقىن.
