Tanymal aıtysker aqyn, búginde «Alataý» dástúrli óner teatrynyń dırektory qyzmetin atqaryp júrgen Rınat Zaıtov Prezıdent Qasym-Jomart Toqaevtyń Qazaqstan halqyna Joldaýyna pikir bildirdi dep habarlady "Adyrna" portaly turkystan.kz saıtyna siltep.
«Memleket basshysy Qasym-Jomart Kemeluly Toqaev qos Palatanyń birlesken otyrysyna qatysyp, Qazaqstan halqyna Joldaýyn arnady. Bul Joldaýdy biz asyǵa kúttik, úlken qobaljýmen tyńdadyq. Sebebi, osy joly Prezıdent burynǵy dástúrdi ózgertip, eldiń negizgi baǵyt-baǵdaryn aıqyndaý, Jańa Qazaqstandy qurý boıynsha naqty qadamdardy atady», – dep bastady sózin ol.
Odan ári aıtysker Prezıdenttiń qańtar qasireti men jańa oblystardy ashýǵa qatysty oılarymen tolyq kelisetinin atap ótti.
«Qańtar oqıǵasy», odan keıin bolǵan elimizdegi birqatar kútpegen jaǵdaılar, osylardyń barlyǵy bir túıindi qajet etti. Sol túıin búgin aıtyldy dep oılaımyn óz basym. Qazaqstan azamattarynyń da kóńilinen shyqty deı alamyn. Atap aıtatyn bolsam, eńsesi túsip, ábden tozyńqyrap qalǵan óńirlerdiń qaıta jandanýyna múmkindik berip, Abaı, Ulytaý, Jetisý oblystary ashyldy. Bul sońy emes bolar. Óıtkeni, bizde áli de ondaı aımaqtar bar», – dedi ol.
Sonymen qatar, ol Toqaevtyń Konstıtýııalyq sot, Ulttyq quryltaı, Esep komıtetiniń ornyna joǵary aýdıtorlyq Palata qurý, Máslıhat tóraǵasy laýazymyn engizý, saılaý zańnamalarynyń saqtalýyn qadaǵalaý úshin baıqaýshylardyń quqyqtary men jaýapkershiligin naqty belgileý, majorıtarlyq saılaý júıesin qoldaný, Prezıdenttiń ókilettik kezeńinde partııaǵa músheligin toqtatý mindetin zańnamalyq túrde resimdeý, ákimder men olardyń orynbasarlaryna partııa fılıaldarynda qyzmet atqarýǵa zań júzinde tyıym salý, buqaralyq aqparat quraldarynyń básekege qabiletti jáne erkin bolýyna qatysty usynystaryna qoldaý bildirdi.
«Osy usynystardyń bári biz úshin úlken qýanysh. Barlyǵy tegis quptarlyq. Taǵy bir kóńil qýantatyny, Almaty oblysynyń ortalyǵy Qapshaǵaıǵa Qonaevtyń esimin berý týraly aıtyldy. Eger tańdaý halyq jaqta bolsa, qazirdiń ózinde 80 paıyzy qoldaıdy. Óziniń basshylyq mysymen, Prezıdenttik ókilettiligimen osy jyldyń ortasyna deıin joǵaryda atalǵandardyń oryndalýyn talap etýi biz úshin sert bergenmen birdeı boldy. Qudaı buıyrtsa, Joldaý eshqandaı kedergisiz elimizge ońtaıly ózgerister ákeledi. Sony kórýge jazsyn. Jasasyn, Jańa Qazaqstan! Prezıdent Joldaýyna alǵys bildiremiz», – dedi aqyn.
