بالالار جىلىنا تارتۋ رەتىندە سىر تورىندە رەسپۋبليكالىق وقۋشىلار ايتىسى ۇيىمداستىرىلدى. «كوكتەم نۇرى» اتاۋىمەن ايشىقتالعان دودا ءاز-ناۋرىز مەرەكەسىنىڭ اجارىن اشتى، دەپ حابارلايدى “ادىرنا” ۇلتتىق پورتالى.
ايتىسقا ەلىمىزدىڭ 5 ءوڭىرى مەن قىزىلوردا قالاسى جانە سىرداريا، شيەلى اۋداندارىنان كەلگەن 10 ايتىسقەر باق سىنادى. ايتىسقا سۋساپ كەلگەن تۇرعاندار سوزدەن قامشى ورگەن ارقالى جاس اقىنداردىڭ ونەرىنە ءتانتى بولدى.
وبلىس اكىمى گۇلشارا ابدىقالىقوۆا ايتىستىڭ القاسىن قىزدىرىپ، ءسوز دوداسىنا تۇسكەن جاس اقىنداردى قولداپ، بالالار جىلى اياسىندا وقۋشىلار اراسىنداعى ايتىستىڭ قىزىلوردادا باستالۋىنىڭ وزىندىك ءمانىن اتاپ ءوتىپ، وڭىردە ايتىستىڭ ورنىنا توقتالدى.
“ويلى ءسوزدى ايتا بىلگەن ايتىس اقىندارىن حالىق قاشان دا قۇرمەت تۇتقان. وبلىستا ايتىس ءداستۇرلى تۇردە ۇزدىكسىز ءوتىپ كەلەدى. سىر ەلى ءوزىنىڭ ارىدەگى نارتاي, ماناپ، كەشەگى ماحانبەتقالي، زاماددين، بەرىدەگى سەرىك، ەلەنا، ابىلقايىر، بۇگىنگى مۇحتار، نۇرمات، مەيىربەكتەي ايماق ايتىسىن اسقاقتاتىپ جۇرگەن اقىندارىمەن ماقتانادى.سونىڭ ىشىندە ايتىستىڭ اقتاڭگەرى مۇحتار نيازوۆتىڭ ءۇش مارتە «التىن دومبىرا» يەگەرى اتانىپ، ماڭگىلىككە سىيعا تارتۋى - ۇلتتىق ونەرىمىزدىڭ سىر ەلىندەگى مارتەبەسىنىڭ كورسەتكىشى سەكىلدى. بۇگىن، مىنە، ۇرپاقتار ساباقتاستىعىنىڭ بەلگىسىندەي رەسپۋبليكامىزدىڭ تۇكپىر-تۇكپىرىنەن دارىندى، ويى زەرەك، تەمىرقانات جاس تۇلەك اقىندارىمىز سىر وڭىرىنە جينالىپ وتىر”، - دەدى گۇلشارا ابدىقالىقوۆا.
ءسوزدىڭ قۇنى جوعارى قويعان جاس اقىنداردىڭ ءسوز دوداسىنا بەلگىلى ايتىسكەر اقىن، مەملەكەتتىك «دارىن» سىيلىعىنىڭ يەگەرى بەكارىس شويبەكوۆ, ءۇش دۇركىن «التىن دومبىرا» يەگەرى، سىر سۇلەيى مۇحتار نيازوۆ جانە بەلگىلى جىرشى-تەرمەشى، حالىقارالىق كونكۋرستارىنىڭ لاۋرەاتى، حالىقارالىق اقىن-جىراۋلار وداعىنىڭ مۇشەسى اماندىق بۇرلىباەۆ تورەلىك ەتتى.
بايقاۋ قورىتىندىسىمەن حالىق اقىنى ماناپ كوكەنوۆ اتىنداعى باس جۇلدە مەن اقشالاي سىيلىق قىزىلوردالىق مەيىرجان قارتبايعا تابىستالدى.
ءى ورىن العان ماڭعىستاۋلىق ەرسۇلتان اۋشانوۆقا، ءىى ورىن شيەلىلىك ءامىرحان ەلدارعا بۇيىردى. سونداي-اق، تاراز قالاسىنىڭ تۋماسى اليحان ياشار مەن اقتوبەلىك نۇرادين اراي ءىىى ورىندى ءوزارا ءبولىستى.
مۇنان بولەك، ارنايى نوميناتسيا جەڭىمپازدارىنا 100 مىڭ تەڭگەدەن 5 جۇلدە تابىستالدى.
“ادىرنا” ۇلتتىق پورتالى
