بيىل وبلىس اكىمىنىڭ تاپسىرماسىنا سايكەس، جەرگىلىكتى تۇرعىنداردى ءوزىن-ءوزى الەۋمەتتىك ماڭىزى بار باۋ-باقشا ونىمدەرىمەن قامتۋ ماقساتىندا 3,0 مىڭ گەكتار جەر دايىندالۋدا. تيىسىنشە، 13 مىڭعا جۋىق وتباسىنا ارنايى جەر ءبولىنىپ بەرىلەدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى دۇيسەباەۆ تالعات مالىمدەدى.
- جىل سايىن مەملەكەت تاراپىنان اگرارلىق سالانى دامىتۋعا ەرەكشە قولداۋ كورسەتىلۋدە. بيىل دا اۋىل شارۋاشىلىعى سالاسىنا 18,3 ملرد. تەڭگەگە جۋىق قارجى ءبولىندى. بۇدان بولەك، ايماق باسشىسىنىڭ تاپسىرماسى بويىنشا بىلتىردان باستاپ جەرگىلىكتى تۇرعىنداردى ءوزىن-ءوزى الەۋمەتتىك ماڭىزى بار كارتوپ، كوكونىس، باقشا ونىمدەرىمەن قامتاماسىز ەتۋ جۇمىستارى باستالعان بولاتىن. وسى جىلى دا بۇل باعىتتاعى جۇمىستار جالعاسادى. قازىرگى تاڭدا قوسىمشا 3,0 مىڭ گەكتار جەر دايىنداۋ جۇمىستارى جۇرگىزىلۋدە. بۇگىندە كوكتەمگى ەگىن ەگۋ جۇمىستارىنا قاجەتتى اۋىل شارۋاشىلىعى داقىلدارىنىڭ تۇقىمىمەن، مينەرالدى تىڭايتقىشتارمەن، تەحنيكالارمەن جانە ارزانداتىلعان ديزەل وتىنىمەن قامتاماسىز ەتۋ جۇمىستارى كەستەگە سايكەس اتقارىلۋدا، - دەدى باسقارما باسشىسى تالعات دۇيسەباەۆ.
بريفينگ بارىسىندا شارۋا يەلەرىنە بەرىلەتىن جەڭىلدەتىلگەن نەسيە مەن اگرارلىق باعدارلامالاردىڭ تيىمدىلىگى تۋرالى ايتىلدى.
-كوكتەمگى ەگىن جانە ءونىم جيناۋ جۇمىستارىنا ارنالعان «كەڭ دالا» باعدارلاماسى جىلدىق پايىزى 5 پروتسەنت. سايكەسىنشە شارۋا يەلەرىنە 10 ملرد.تەڭگەگە دەيىن كەپىلدەندىرىلگەن تالاپقا سايكەس نەسيە بەرىلەدى. ال «اگروبيزنەس» باعدارلاماسى اۋىل شارۋاشىلىق قۇرالدارىن ساتىپ الۋعا جانە اينالىم قاراجاتىن تولتىرۋعا ارنالعان. باعدارلامانىڭ جىلدىق پايىزى 18-22 پايىز، ياعني 1 ملن تەڭگەدەن 10 ملرد.تەڭگەگە دەيىن كەپىل ارقىلى نەسيە بەرىلەدى. ءۇشىنشى «ىسكەر» باعدارلاماسى مال شارۋاشىلىعىن دامىتۋعا جانە ، اۋىل شارۋاشىلىعى ونىمدەرىن ساقتاۋعا ارنالعان، - دەدى «اگرارلىق نەسيە كورپوراتسيا» اق قىزىلوردا وبلىسى بويىنشا فيليالىنىڭ ديرەكتورى ماحانبەت تۇرماحانوۆ.
"ادىرنا" ۇلتتىق پورتالى
