14 ناۋرىز – كورىسۋ كۇنىنە وراي قىزىلوردا قالاسىندا «امال كەلدى، جىل كەلدى» اتتى دۋماندى مەرەكەلىك شارا ۇيىمداستىرىلدى. قالالىق مادەني-تىنىعۋ پاركىنىڭ كىرەبەرىس الاڭىندا وتكەن ءىس-شاراعا قالا تۇرعىندارى مەن قوناقتارى، ءتۇرلى ەتنوس وكىلدەرى، سونداي-اق قازاقستان حالقى اسسامبلەياسى جانىنداعى جاستار ۇيىمىنىڭ بەلسەندىلەرى قاتىستى.
مەرەكەلىك شارانىڭ باستى ماقساتى – ەلىمىزدەگى بىرلىك پەن تاتۋلىقتى نىعايتۋ، كوپۇلتتى قوعام اراسىنداعى دوستىق پەن ءوزارا قۇرمەتتى دارىپتەۋ.
ءىس-شارا بارىسىندا قاتىسۋشىلار ۇلتتىق داستۇرگە ساي ءبىر-بىرىمەن كورىسىپ، اقجارما تىلەكتەرىن ارنادى. باعدارلاما اياسىندا قازاقتىڭ ۇلتتىق سپورت تۇرلەرىنەن جارىستار ۇيىمداستىرىلىپ، ارقان تارتىس، قول كۇرەس، لاڭگى تەبۋ سىندى سايىستار كورەرمەندەردىڭ قىزىعۋشىلىعىن تۋدىردى.
سونىمەن قاتار قازاق حالقىنىڭ سالت-داستۇرىنەن تاعىلىمدى كورىنىستەر كورسەتىلىپ، قالا ونەرپازدارى مەرەكەلىك كونتسەرتتىك باعدارلاماسىن ۇسىندى. ءان مەن كۇيگە، ۇلتتىق ويىندارعا ۇلاسقان شارا كوپشىلىككە كوتەرىڭكى كوڭىل-كۇي سىيلادى.
