بۇگىن قىزىلوردا وبلىسىنىڭ جاڭاقورعان جانە شيەلى اۋداندارىندا قايتا جاڭعىرتىلعان تەمىرجول ۆوكزالدارى سالتاناتتى تۇردە پايدالانۋعا بەرىلدى.
جاڭاقورعان ۆوكزالى 1 ملرد تەڭگەدەن استام قارجىعا قايتا جاڭعىرتىلىپ، تاۋلىگىنە 121 جولاۋشىعا قىزمەت كورسەتۋگە بەيىمدەلسە، اۋماعى 9 474 شارشى مەتر بولاتىن شيەلى ۆوكزالىنا 836 ملن تەڭگەدەن استام قارجى جۇمسالىپ، تاۋلىگىنە 200 جولاۋشىنى قابىلدايتىن زاماناۋي نىسانعا اينالدى. ەكى ۆوكزالدا دا قاسبەت پەن ىرگەتاس جاڭارتىلىپ، شاتىر، ەسىك-تەرەزەلەر اۋىستىرىلدى، ينجەنەرلىك جەلىلەر مەن جىلۋ جۇيەسى جاڭالانىپ، پەررون اۋماقتارى اباتتاندىرىلدى.
سالتاناتتى راسىمدە وبلىس اكىمى مۇرات ەرگەشباەۆ جاڭعىرتىلعان ۆوكزالداردىڭ تۇرعىندار مەن جولاۋشىلارعا جايلى ءارى قاۋىپسىز جاعداي جاساپ، ءوڭىردىڭ كولىك ينفراقۇرىلىمىن دامىتۋعا سەرپىن بەرەتىنىن اتاپ ءوتتى.
