مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا ۇكىمەت قازاقستان بويىنشا كولىك ينفراقۇرىلىمىن جاڭعىرتۋ جانە تەمىرجول ۆوكزالدارىن جاڭارتۋ جونىندەگى كەشەندى شارالاردى جۇزەگە اسىرۋدا. وسى جۇمىستار اياسىندا تۇركىستان وبلىسىنداعى «تۇلكىباس» تەمىرجول ۆوكزالىنىڭ رەكونسترۋكتسياسى اياقتالدى.
«تۇلكىباس» ستانساسىنىڭ تاريحى 100 جىلدان اسادى. ستانسانىڭ العاشقى عيماراتى 1916 جىلى سالىنعان. جاڭا ۆوكزال كەشەنى تاۋلىگىنە 200-گە جۋىق جولاۋشىعا قىزمەت كورسەتۋگە ەسەپتەلگەن جانە ازاماتتار ءۇشىن قولايلى جاعدايلاردى قامتاماسىز ەتەدى. عيماراتتا 90 ورىندىق كۇتۋ زالى بار، بۇل بۇرىنعى ۆوكزالدان ەكى ەسە كوپ. سونداي-اق تەمىرجول كاسسالارى، انىقتامالىق بيۋرو، تاماقتانۋ پۋنكتتەرى، قىزمەتتىك ءۇي-جايلار جۇمىس ىستەيدى.
كەدەرگىسىز ورتانى قۇرۋعا ەرەكشە نازار اۋدارىلدى. مۇمكىندىگى شەكتەۋلى ازاماتتار مەن مۇگەدەكتەر ءۇشىن ارنايى ايماقتار قاراستىرىلىپ، ليفت ورناتىلدى. سونىمەن قاتار انا مەن بالا بولمەسى جابدىقتالعان.
رەكونسترۋكتسيا اياسىندا ۇزىندىعى 540 مەتر بولاتىن پەررون پلاتفورماسى جاڭارتىلدى. ىرگەلەس اۋماقتا اباتتاندىرۋ جانە كوگالداندىرۋ جۇمىستارى جۇرگىزىلىپ، بەينەباقىلاۋ جانە داۋىس زورايتقىش جۇيەلەرى ورناتىلدى. سونىمەن قاتار جاياۋ جۇرگىنشىلەر كوپىرى رەكونسترۋكتسيالاندى.
تەمىرجول ينفراقۇرىلىمىن جاڭعىرتۋ باعدارلاماسى ەلىمىزدىڭ ءارتۇرلى وڭىرلەرىندەگى ۆوكزالداردى قامتيتىنىن جانە جولاۋشىلار ءۇشىن زاماناۋي جانە قولايلى جاعدايلار جاساۋعا باعىتتالعانىن اتاپ ءوتۋ ماڭىزدى. جالپى، مەملەكەت باسشىسىنىڭ تاپسىرماسى اياسىندا ەلىمىز بويىنشا 124 تەمىرجول نىسانىن جوندەۋ جوسپارلانعان. بۇگىنگى تاڭدا 72 ۆوكزال جوندەلىپ، پايدالانۋعا بەرىلدى. تاعى 49-ىن رەكونسترۋكتسيالاۋ جىل سوڭىنا دەيىن اياقتاۋ جوسپارلانۋدا.
استانا، الماتى جانە تۇركىستان قالالارىنداعى تاريحي-ارحيتەكتۋرالىق قۇندىلىعى بار ءۇش ءىرى ۆوكزال بويىنشا جۇمىستار جەكە بلوك رەتىندە قاراستىرىلعان. ولاردى جاڭعىرتۋ جۇمىستارى تاريحي كەلبەتىن ساقتاۋ تالاپتارىن ەسكەرە وتىرىپ، كەلەسى جىلى اياقتالادى.
