ەندى شەتەلدىك فيلمدەر تىكەلەي يمپورتتالىپ، قازاق تىلىنە دۋبلياجدالادى - مادەنيەت مينيسترلىگى

3049
Adyrna.kz Telegram

قازاقستاندا شەتەلدىك فيلمدەردى تىكەلەي اكەلىپ، قازاق تىلىنە دۋبلياجداۋدى جوسپارلاپ وتىر. بۇل تۋرالى LS اگەنتتىگى حابارلادى، دەپ جازادى "ادىرنا" ۇلتتىق پورتالى.

مادەنيەت جانە سپورت مينيسترلىگى رەسەيگە قاتىستى سانكتسيالار ەنگىزىلگەنگە دەيىن بارلىق شەتەلدىك فيلمدەر قازاقستانعا كورشى ەلدىڭ ديستريبيۋتورلارى ارقىلى اكەلىنگەنىن ءتۇسىندىردى.

"كينوتەاترلاردى قولداۋ جانە كينوكونتەنت تاپشىلىعىن بولدىرماۋ ءۇشىن تىكەلەي پروكاتتاۋ جانە شەتەلدىك فيلمدەردى قازاق تىلىنە دۋبلياجداۋدى سۋبسيديالاۋ ماقساتىندا قازاقستانعا شەتەلدىك فيلمدەردى اكەلۋ ماسەلەسى پىسىقتالۋدا", - دەپ ءتۇسىندىردى مينيسترلىكتە.

مادەنيەت مينيسترلىگىندە كينوتەاترلاردا جالعا بەرۋ ءۇشىن ۇلتتىق كينونى قولداۋ مەملەكەتتىك ورتالىعى رەسپۋبليكالىق بيۋدجەت ەسەبىنەن شىعارىلعان 21 كارتينانىڭ تۇساۋكەسەرى بولىپ وتكەن.

"قازاقستاندا الەمدىك جانە وتاندىق فيلمدەردىڭ كورسەتىلىمى ۇزىلگەن جوق. Disney ستۋدياسىنىڭ كەيبىر فيلمدەرىن قوسپاعاندا، فيلمدەردىڭ كورسەتىلىمi جوسپارلانعان كەستەگە سايكەس جۇزەگە اسىرىلادى", - دەپ حابارلادى مينيسترلىكتە.

مينيسترلىك ەلىمىزدە 90 كينوتەاتر جۇمىس ىستەيتىنىن اتاپ ءوتتى. سونىمەن قاتار، پاندەميا كەزەڭىندە ولاردىڭ قىزمەتىن توقتاتا تۇرۋ، شامامەن ەسەپتەۋلەر بويىنشا، كينو كورسەتۋ نارىعى كىرىسىنىڭ كولەمى 2019 جىلعى 30 ملرد تەڭگەدەن 2021 جىلى 17 ملرد تەڭگەگە دەيىن تومەندەدى.

ەستەرىڭىزگە سالا كەتەيىك، بۇعان دەيىن Kinopark & Kinoplexx شەتەلدىك جالداۋ اقىسىنىڭ بولماۋ قاۋپىنە بايلانىستى ماجبۇرلەپ جابىلعانى تۋرالى حابارلادى. كەيىنىرەك كومپانيا جۇمىس جالعاسادى دەپ مالىمدەدى. ەڭ بولماعاندا، ءساۋىردىڭ ەڭ كۇتىلەتىن پرەمەرالارى قازاقستاندا كورسەتىلەدى.

"ادىرنا" ۇلتتىق پورتالى

پىكىرلەر