ەسىمى ەلگە ايگىلى جازۋشى-دراماتۋرگ، قازاق ادەبيەتىنىڭ كلاسسيگى دۋلات يسابەكوۆتىڭ ۇيىندەگى جەڭگەمىز نۇرعايشا جارمۇقامەدوۆا قايتىس بولدى دەگەن حابار قابىرعامىزدى قايىستىرىپ كەتتى. ول كىسى ەشقانداي اۋىرىپ جۇرگەن جوق-تىن، بۇگىن تاڭەرتەڭ جۇرەگى ۇستاپ قالدى دەيدى.
جاقىندا عانا كوكەمىزگە سالەم بەرۋگە ۇيگە بارعاندا جارقىلداپ ءجۇرىپ قارسى الىپ، سەكسەنگە كەلسە دە سەرگەكتىگىن كورسەتىپ، كەلىندەردەن بەتەر جۇگىرىپ، داستارحانىن جايىپ شىعارىپ سالىپ ەدى.
“ەكەۋمىز 56 جىل وتاسقان ەدىك، جايىمنىڭ بارلىعىن جاسايتىن ەدى، ەندى مەنىڭ جاعدايىمدى كىم ويلايدى؟!
ەشقانداي اۋىرا قويماعان ەدى، اياق استىنان تاستاپ كەتە باردى. ەكەۋمىز بيىل سەكسەن جاسىمىزدى تويلايمىز دەپ، جوسپارلاپ جۇرگەن ەدىك.”-دەپ قامىعىپ وتىرعان دۋلات كوكەمىزدى قالاي جۇباتۋدىڭ ءوزى قيىن بولدى…
وتكەن سەنبىدە عانا كورىپ ەدىك دۋلات كوكەمىزدى قازاقستاننىڭ حالىق جازۋشىسى قابدەش ءجۇمادىلدىڭ جىلدىق اسىندا. قيىن بولدى سەكسەنگە كەلگەندە سەرىگىنەن ايرىلۋ!..
الدى الەمنىڭ الدىڭعى قاتارلى ەلدەرىندە جاريالانعان، قازاق ادەبيەتىنىڭ التىن قازىناسىنا ەنگەن شىعارمالارىن جازعاندا جايىن جاساعان، جانىنا دەمەۋ بولعان اسىل جارى، بالالارىنىڭ اياۋلى اناسى بولعان، الپىس جىلعا جۋىق قول ۇستاسىپ بىرگە جۇرگەن ومىرسەرىگىنەن ايرىلۋ اعامىزعا اۋىر تيگەنى انىق…
بەرىك بولىڭىز كوكە! اللانىڭ ۇكىمى عوي، قايتەسىز ەندى. بۇل دا ءبىر اۋىر سىناق، مىقتى بولىڭىز! اللا سابىر بەرسىن! قاسيەتتى رامازان ايىندا دۇنيەدەن ءوتىپتى، ءجانناتتان بولسىن جايى دەپ تىلەيمىز.
الدى پەيىش، ارتى كەنىش بولعاي! قارا ورمان حالقىڭىز بار، قالىڭ قازاعىڭىز بار قايعىڭىزدى بولىسەتىن، دۋلات كوكە، بەكەم بولىڭىز!.
مارقۇمنىڭ وتباسىنا، اسىل جارى، قازاقتىڭ كورنەكتى قالامگەرى دۋلات يسابەكوۆكە، ۇلدارى مەن قىزدارىنا، تۋعان-تۋىستارىنا، اعايىندارعا كوڭىل ايتامىز.
يمانى سالامات بولسىن اسىل جەڭگەمىزدىڭ!
قازىبەك يسا،
"ادىرنا" ۇلتتىق پورتالى
