Esımı elge äigılı jazuşy-dramaturg, qazaq ädebietınıŋ klassigı Dulat İsabekovtyŋ üiındegı jeŋgemız Nūrǧaişa Jarmūqamedova qaitys boldy degen habar qabyrǧamyzdy qaiystyryp kettı. Ol kısı eşqandai auyryp jürgen joq-tyn, bügın taŋerteŋ jüregı ūstap qaldy deidı.
Jaqynda ǧana kökemızge sälem beruge üige barǧanda jarqyldap jürıp qarsy alyp, seksenge kelse de sergektıgın körsetıp, kelınderden beter jügırıp, dastarhanyn jaiyp şyǧaryp salyp edı.
“Ekeumız 56 jyl otasqan edık, jaiymnyŋ barlyǧyn jasaityn edı, endı menıŋ jaǧdaiymdy kım oilaidy?!
Eşqandai auyra qoimaǧan edı, aiaq astynan tastap kete bardy. Ekeumız biyl seksen jasymyzdy toilaimyz dep, josparlap jürgen edık.”-dep qamyǧyp otyrǧan Dulat kökemızdı qalai jūbatudyŋ özı qiyn boldy…
Ötken senbıde ǧana körıp edık Dulat kökemızdı Qazaqstannyŋ Halyq jazuşysy Qabdeş Jūmädıldıŋ jyldyq asynda. Qiyn boldy seksenge kelgende serıgınen airylu!..
Aldy älemnıŋ aldyŋǧy qatarly elderınde jariialanǧan, qazaq ädebietınıŋ altyn qazynasyna engen şyǧarmalaryn jazǧanda jaiyn jasaǧan, janyna demeu bolǧan asyl jary, balalarynyŋ aiauly anasy bolǧan, alpys jylǧa juyq qol ūstasyp bırge jürgen ömırserıgınen airylu aǧamyzǧa auyr tigenı anyq…
Berık bolyŋyz köke! Allanyŋ ükımı ǧoi, qaitesız endı. Būl da bır auyr synaq, myqty bolyŋyz! Alla sabyr bersın! Qasiettı Ramazan aiynda dünieden ötıptı, jännattan bolsyn jaiy dep tıleimız.
Aldy peiış, arty kenış bolǧai! Qara orman halqyŋyz bar, qalyŋ qazaǧyŋyz bar qaiǧyŋyzdy bölısetın, Dulat köke, bekem bolyŋyz!.
Marqūmnyŋ otbasyna, asyl jary, qazaqtyŋ körnektı qalamgerı Dulat İsabekovke, ūldary men qyzdaryna, tuǧan-tuystaryna, aǧaiyndarǧa köŋıl aitamyz.
İmany salamat bolsyn asyl jeŋgemızdıŋ!
Qazybek İSA,
"Adyrna" ūlttyq portaly
