ەلىمىزدە پاندەميا كەزىندە ادامدى ورتەۋگە،ياعني كرەماتسياعا دەگەن سۇرانىس ارتقان. كرەماتسيا كەزىندە ءمايىتتى 1 ساعاتتان ەكى ساعاتقا دەيىنگى ۋاقىتتا 800-1100°س تەمپەراتۋرادا ورتەيدى. جانۋ ۋاقىتىسىنىڭ ۇزاقتىعى ادامنىڭ جاسىنا،سالماعىنا،قانداي اۋرۋمەن قايتىس بولعانىنا بايلانىستى بولادى. مىسالى، ءتىرى كەزىندە تۋبەركۋلەز نە ىسىك اۋرۋىمەن اۋىرعان ادامدار ۇزاعىراق جانادى.
جالپى تاريحىنا توقتالار بولساق ، كرەماتسيا العاش رەت نەوليت پەن قولا كەزەڭدەرىندە پايدا بولعان. جاپونيادا،ءۇندىستان مەن وڭتىستىك-شىعىس ازيانىڭ ەلدەرىندە كرەماتسيا ەرتەدەن بار.
قازاقستاننىڭ ەجەلگى تاريحىندا كرەماتسيا ءتاسىلى قولا داۋىرىنە جاتاتىن اندرون مادەنيەتىنىڭ نۇرا كەزەڭىندە قولدانىلا باستادى. ال،ەۋروپا ەلدەرىندە كرەماتسيا باسىندا ءدىنسىز حالىقتاردىڭ سالتى دەپ سانالعانىمەن،19 عاسىردىڭ ەكىنشى جارتىسىندا قولدانىلا باستاپ،كرەماتوريلەر سالىنا باستادى.ەڭ العاشقى كرەماتوري 1876 جىلى ميلان قالاسىندا سالىنعان ەكەن.
يسلام بولسا كرەماتسياعا ءۇزىلدى-كەسىلدى قارسى بولعانىمەن ، ەلىمىزدە دە كرەماتوريلار سالىنۋ قولعا الىنا باستاعان. كرەماتسيانى بۇرىن قىمبات باعادا نوۆوسيبيرسك قالاسىنان جاساتىپ جۇرگەن كەيبىر قازاقستاندىقتار ءۇشىن كرەماتسيا پەشتەرى ەلىمىزدە اشىلسا قولجەتىمدى بولماق.
تاياقتىڭ ەكى ۇشى بولادى دەمەكشى،ءبىر ادامدار كرەماتوري سالۋدى قولداسا،بىرەۋلەرى بۇل دىنگە قايشى،سۇمدىق جايت دەپ وتىر. ءيا،شىنىمەندە قازاقتىڭ كەڭ جازيرا ۇلان-بايتاق دالاسىندا ءمايىتتى ارۋلاپ كومەتىن جەر از بولعانى ما؟ ءبىز ۇندىلەر ەمەسپىز كۇلدى كوككە شاشاتىن، ءبىز اتا-بابا ارۋاعىنىڭ باسىنا بارىپ قۇران باعىشتايتىن قازاقپىز.
"ادىرنا" ۇلتتىق پورتالى
