ەلىمىزدىڭ ءار ايماعىندا قۇرىلىس جۇمىستارى ءبىر ءسات توقتاعان ەمەس. قاقاعان قىستا دا، مي قايناتار ىستىق جازدا دا قۇرىلىس جۇمىستارى دامىلسىز ءجۇرىپ جاتادى. قۇرىلىس نىساندارىندا ارنايى تەحنيكالار تىنىم تاپپاستان جۇمىس ىستەيدى. ەلىمىزدەگى قۇرىلىس كومپانيالارىنىڭ كوبى قۇرىلىس تەحنيكالارىن جالعا الۋ جۇيەسى ارقىلى جۇمىس جاسايدى. بۇل الەمدە بار تاجىريبە جانە قارجىلىق مۇمكىندىگى از كومپانيالار ءۇشىن ءتيىمدى. الايدا ونىڭ ءوز تاۋەكەلدەرى بار دەسەك تە بولادى. وعان ماقالا بارىسىندا كوزىڭىز جەتەدى.
2015 جىلدىڭ 26 قاراشاسىندا قاراعاندى قالاسىندا باسشىسى حاسەنوۆ دۋلات بولىپ تابىلاتىن «Kemenger» جشس مەن ديرەكتورى دجۋبانىشەۆا و.س بولىپ تابىلاتىن «ISS Engineering» جشس اراسىندا ءنومىرى 89/11-15 كەلىسىمشارتى جاسالدى. كەلىسىمشارت بويىنشا «Kemenger» جشس-ءى ءوزىنىڭ قۇرىلىس تەحنيكالارىن «ISS Engineering» جشس جالعا بەرۋگە كەلىستى. كەلىسىمشارتتا ايىنا 280 ساعاتقا قۇرىلىس تەحنيكاسىن جالعا الۋ كەلىسىلدى. جالعا بەرشى جالعا الۋشىعا ەكى كۇننىڭ ىشىندە قۇرىلىس تەحنيكالارىن جەتكىزىپ بەردى. وسىلايشا تاراپتار قول الىسىپ، جۇمىستى باستاپ كەتتى.
دەگەنمەن كەلىسىمشارتتا تايعا تاڭبا باسقانداي كورسەتىلگەن تالاپتار وكىنىشكە وراي كوپ ۇزاماي جالعا الۋشى تاراپىنان بۇزىلا باستادى. قۇرىلىس تەحنيكالارىن جالعا الۋشى «ISS Engineering» جشس كەلىسىمشارتتا جازىلعان ۋاقىتتا قارجىنى بىرنەشە مارتە وتەمەدى. 2016 جىلدىڭ 13 قازانىندا «Kemenger» جشس تاراپىنان «ISS Engineering» جشس تاراپىنا ارنايى حات جازىلدى. حاتتا «ISS Engineering» ءجشسنىڭ 35115404 تەڭگە بەرەشەك ەكەنى ايتىلادى. جالعا بەرۋشى تاراپ جالعا الۋشىنىڭ قىرۋار قارىزىنا قاراماستان ءوز تاراپىنان كەلىسىمشارتتا بەكىتىلگەن مىندەتتەمەلەردى ورىنداۋدى ءبىر ساتكە بولسىن توقتاتپاعان، كەرىسىنشە تەك قارجىنى وتەۋ كەرەكتىگى جايىندا اۋىزشا ەسكەرتۋ جاساپ كەلگەن. سونىمەن قاتار جالعا الۋشى قارجىنى ۋاقىتىلى تولەمەگەندىكتەن «Kemenger» جشس اقشالاي تاپشىلىق سەزىنىپ، ءوز قىزمەتكەرلەرىنىڭ ايلىعىن بەرۋدە قينالعاندىعىن ايتادى. حات سوڭىندا قارىزدى ون كۇننىڭ ىشىندە ءوتىنىپ، تالاپ ورىندالماعان جاعدايدا سوتقا جۇگىنۋگە ءماجبۇر بولاتىنىن ەسكەرتىپتى.
الايدا ايتىلعان ءسوز سول جەردە قالعان سىڭايلى. سەبەبى 2017 جىلدىڭ 9- اقپانىندا «Kemenger» جشس تاراپىنان «ISS Engineering» جشس-نە قارىزدى وتەۋ كەرەكتىگى جايلى ەسكەرتپە حات كەلىپ ءتۇستى. وندا قارىزدىڭ كولەمى 34998737 تەڭگەنى قۇرايتىنى، حاتتى العاننان كەيىن 10 كۇن ىشىندە تولەمدى جاساۋ مىندەتتى ەكەنى جازىلعان. الايدا «ISS Engineering» جشس بۇل حاتقا مۇلدە جاۋاپ بەرمەگەن، سول سەبەپتى دە 2017 جىلدىڭ 19 ساۋىرىندە كومپانياعا كەزەكتى حات جىبەرىلدى. وندا دەرەۋ ارادا قارجىنى تولەۋدى سۇراپ، حاتقا جاۋاپ بەرۋدى تالاپ ەتكەن بولاتىن.
«Kemenger» جشس-نە 2017 جىلدىڭ 21-قىركۇيەگىندە «ISS Engineering» جشس-نەن جاۋاپ حات كەلىپ ءتۇستى. وندا قاراعاندى وبلىسىنىڭ ارنايى ەكونوميكالىق سوتى 2017 جىلدىڭ 24-تامىزىندا «ISS Engineering» جشس قارجى تولەۋگە قابىلەتسىز دەپ شەشىم شىعارعانى جازىلعان. وسىلايشا جالعا الۋشى جالعا بەرۋشىدەن بۇعاتتالعان ەسەپشوتتاردى اشۋدى سۇراپتى. ەسەپشوتتارعا قارجى ءتۇسىپ، ونىڭ 30 پايىزىن جالعا بەرۋشى الدىنداعى قارىزىن وتەۋ ماقساتىندا اۋدارىپ وتىراتىنىن جازعان. الايدا قارجى ءتۇسۋ ءۇشىن ۋاقىت كەرەكتىگىن دە ايتا كەتىپتى. وسىلايشا قارجى تولەۋدى رەتتەۋ تۋرالى كەلىسىمگە قول قويۋدى سۇراعان.
2017 جىلدىڭ 2-قازانىندا «Kemenger» جشس جاۋاپ حات جازىپ، «ISS Engineering» جشس تاراپىنان بىرنەشە الداۋ فاكتىلەرى بولعانىن كەلتىرە كەتەدى. ياعني ەكونوميكالىق سوتقا جۇگىنىپ، ءوزىنىڭ قارجى تولەۋ قابىلەتىنىڭ جوقتىعىن جاساتۋ بويىنشا پروتسەسس بولاتىندىعى جايلى اقپاراتتاندىرۋ حاتىن جازباعان. سونىمەن قاتار ءوزىنىڭ ارەكەتتەرى ارقىلى «Kemenger» جشسنى بانكروتتىق جاعدايعا اكەلەتىندىگىن ەسكەرتىپ، قارجى تولەۋدى رەتتەۋ تۋرالى كەلىسىمگە قول قويمايتىنىن ناقتى ايتادى.
Cول جىلدىڭ 24-قازانىندا «ISS Engineering» جشس تاعى ءبىر حات جازىپ، كەلىسىمگە كەلۋدى سۇرايدى. سول ارقىلى بانكروت بولۋدان كومپانيانى ساقتاپ، جالعا بەرۋشى الدىنداعى قارىزىن وتەۋگە مۇمكىندىك بەرۋدى ءوتىنىپتى. سونداي-اق، 27-قازاندا وتەتىن تالقىلاۋعا قاتىسىپ، ماسەلەنى ەكى كومپانيا بىرلەسە وتىرىپ شەشۋدى سۇراعان.
ارتىنشا «ISS Engineering» جشس قارجىنى وتەۋدىڭ ورنىنا بىرنەشە مارتە ەكونوميكالىق سوت ارقىلى جالعا بەرۋشىمەن وتىرىس وتكىزىپ، جاڭا كەلىسىم جاساۋعا ۇسىنىستار جاساعان.
2021 جىلدىڭ 20-مامىرىندا، «Kemenger» جشس حات جازىپ، 33498206 تەڭگە قارىزدى وتەۋدى سۇرايدى. بۇعان دەيىن جالعا الۋشى تاراپ ءبىر مارتە عانا قارىزىن وتەگەن، ياعني باستاپقىدا جازعان قارىزىمىزدىڭ 1500501 تەڭگەسىن عانا اۋدارعان. ءبىر مارتە. ارتىنشا قايتا قارجى اۋدارۋدى دوعارعان.
اتالمىش حاتقا قارىز تاراپ، ياعني «ISS Engineering» جشس قاراعاندى وبلىسىنىڭ ارنايى ەكونوميكالىق سوتىنىڭ شەشىمى بويىنشا 5 جىلعا «وڭالتۋ جانە بانكروتتىق تۋرالى» زاڭىنىڭ اياسىندا ارنايى شەشىم شىعارىپ، قارجىلىق ماسەلەسىن رەتتەۋگە كومەكتەسەتىن شەشىم شىققانىن ايتادى. ونىڭ ىشىندە 2018-2023 جىلدار ارالىعىندا قارجىلىق جاعدايىن رەتتەستىرۋگە قاتىستى مۇمكىندىك بەرىلگەن. سوندىقتان قارىز تاراپ قارىزدىڭ قالعان بولىگىن قارجىلىق مۇمكىندىگىنە بايلانىستى 2023 جىلعا دەيىن تولەپ بىتىرەمىز دەگەن جاۋاپتى بەرىپتى.
بۇل كومپانياعا بەيرەسمي دەرەككوزدەر بويىنشا اسەت يسەكەشەۆتىڭ تۋىسى ەرلان يسەكەشەۆتىڭ دە قاتىسى بولۋى مۇمكىن دەيدى. مىسالى ەرلان يسەكەشەۆ «ISS Corporation» كوپسالالى كومپانياسىنىڭ ديرەكتورلار كەڭەسىنىڭ توراعاسى. ول قاراعاندى وبلىسى اكىمىنىڭ ورىنباسارى قىزمەتىن دە اتقارعان. ۇزاق جىلدار بويى ءتۇرلى باسقارۋشىلار قىزمەتىندە بولعان. مىسالى «ISS Corporation» كومپانياسىنىڭ ديرەكتورلار كەڭەسىنىڭ باسشىسى، «سامۇرىق ەنەرگو» اق ديرەكتورلار كەڭەسىنىڭ مۇشەسى، «Falah Partners» ينۆەستيتسيالىق قورىنىڭ مۇشەسى (2009-2011 گگ.), «KazynaCapitalManagement» اق كومپانيا باسشىسىنىڭ كەڭەسشىسى، قاراعاندى وبلىسى اكىمىنىڭ ورىنباسارى، «قاراعاندى جىلۋ» جشس باس ديرەكتورى «قاراعاندى جارىق» باس ديرەكتورى قىزمەتتەرىن اتقارعان. وسىنشا كوپ لاۋازىم اتقارعان ەرلان يسەكەشەۆتىڭ دە بۇل كومپانياعا قاتىسى بولۋى مۇمكىن دەگەن جورامالدى جوققا شىعارۋعا بولماس.
بۇل نە سۇمدىق؟ كەلىسىمشارتتى بىرنەشە مارتە بۇزىپ، ارتىنشا ارنايى سوت ارقىلى شەشىم شىعارتىپ، 2015 جىلى جاسالعان كەلىسىمدى سوزباقتاتىپ ساعىزشا سوزىپ، جالعا بەرۋشى كومپانيانى قارجىلىق تۇرعىدان ابدەن تيتىقتاتىپ، كەيىن «قارجىمىز بولعاندا تولەيمىز عوي» دەگەن سىڭايداعى جاۋاپ قايتارعان كومپانيانىڭ ارەكەتىن قالايشا اقتاپ الۋعا بولادى؟!
"ادىرنا" ۇلتتىق پورتالى
