قازاقستان رەسپۋبليكاسى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ قازاقستان ازاماتتىعىن الۋعا قانشا رەسەيلىك ازاماتتىڭ ءوتىنىش بىلدىرگەنىن ايتتى، دەپ حابارلايدى “ادىرنا” ۇلتتىق پورتالى Zakon.kz سايتىنا سىلتەمە جاساپ.
170-كە جۋىق رەسەيلىك قازاقستاننىڭ ازاماتتىعىن الۋعا ءوتىنىش ءبىلدىردى. ءبىزدىڭ ساراپتاما كورسەتكەندەي، بىلتىر دا وسىنشاما ادام ءوتىنىش بىلدىرگەن. ال بۇعان دەيىن، ءتىپتى ودان دا كوپ – 200-دەن استام ادام قازاقستان ازاماتتىعىن العىسى كەلگەن، دەدى قر ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ.
سونىمەن قاتار مارات قوجاەۆتىڭ ايتۋىنشا، تۇرۋعا ىقتيارحات سۇراعاندار سانىنىڭ ازداپ وسكەنى بايقالادى. بىلتىر بۇل كورسەتكىش 350-دەن 400-گە دەيىن بولسا، 2022 جىلدىڭ باسىنان بەرى مىڭ ادامعا دەيىن جەتكەن.
سونىمەن قاتار 10 مىڭعا جۋىق ادام جەكە سايكەستەندىرۋ ءنومىرىن (جسن) الۋعا ءوتىنىش بىلدىرگەن. ونى كەز كەلگەن شەت مەملەكەتتىڭ ازاماتى بيزنەس جۇرگىزۋ، قارجىلىق وپەراتسيالىق پروتسەستەر ءۇشىن الا الادى. جسن ازاماتتىق نەمەسە تۇرۋعا رۇقسات الاتىنداي قۇرال ەمەس، دەدى مارات قوجاەۆ.
”ادىرنا” ۇلتتىق پورتالى
