كسرو باس حاتشىسى اندروپوۆتىڭ كومەكشىسى ۆولسكي ءوزىنىڭ ەستەلىكتەرىندە مىنا ءبىر ەپيزودتى جەتكىزەدى: كەزىندەگى مينيسترلەر كەڭەسى توراعاسىنىڭ ورىنباسارى يگناتي تروفيموۆيچ نوۆيكوۆ «اتومماش» زاۋىتىنداعى قۇرىلىس جۇمىستارىنا تىكەلەي جاۋاپتى بولىپتى. ءبىر كەزەڭدە كەنەتتەن زاۋىت باتا باستاپتى. تسيمليانسك سۋ قويماسىنىڭ ماڭىنداعى قۇرىلىستىڭ ىرگەتاسىن قالاعان كەزدە قۇرىلىسشىلار ءبىر نارسەنى ەسكەرمەگەن بولسا كەرەك. سودان كراندار قوزعالا المايدى. بۇل بىلاي قاراعاندا مەملەكەتتىك ماڭىزى بار ماسەلە.
سونىمەن بۇل ماسەلەنى ساياسي بيۋروعا جەتكىزەدى. نوۆيكوۆ سول جەردە ءسوز سويلەيدى: «وسى اپتادا مەن بوس ەمەسپىن، كەلەسى اپتادا ۆولگودونسكىگە ۇشامىن، ءبارىن رەتتەيمىز».
اندروپوۆ ءبىر اۋىز ءتىل قاتپايدى. ال مينيسترلەر كەڭەسىنىڭ توراعاسى تيحونوۆ نوۆيكوۆتى قولداپ:
«دۇرىس، يگناتي تروفيموۆيچ ۇشسىن، سول جەردە قاراستىرامىز»، – دەيدى.
گورباچەۆ پەن شەۆاردنادزە دە باسىن يزەيدى: «ءبىز دە بارىپ، جاي-جاعدايدى كورۋىمىز كەرەك!».
اندروپوۆ بارلىعىن تىڭداپ الىپ، ادەتىنشە كوزىلدىرىگىن شەشىپ:
«مەنىڭ پىكىرىم، نوۆيكوۆ جولداستى جۇمىستان بوساتىپ، پارتيادان شىعارۋ كەرەك»، — دەيدى.
سول كەزدە ءبارى ءۇنسىز قالادى. تيحونوۆ ءبىرىنشى بولىپ اندروپوۆتىڭ سوزىنە ىلەسىپ: «شىنىمەن دە، ماسقارا! جۇمىستان كەتىڭىز» - دەيدى. قالعاندارى دا ءبىراۋىزدان نوۆيكوۆقا «جول سىلتەيدى».
وسى تۇستا كەشە عانا كاسپي قۇبىرى كونسورتسيۋمىنىڭ جۇمىسىن توقتاتۋعا بايلانىستى پىكىر بىلدىرگەن قر ەنەرگەتيكا ءمينيسترى بولات اقشولاقوۆتىڭ ارەكەتى الگى نوۆيكوۆتىڭ سوزىمەن دالمە-ءدال كەلۋى سايكەستىك پە دەپ قالاسىڭ.
ءمينيستردىڭ اتالعان ماسەلەنى شەشۋ ءۇشىن ماسكەۋگە بارىپ اقىلداسىپ قايتامىن دەگەنى قازىر كوپشىلىكتىڭ اشۋىنا ءتيىپ جاتىر. سوندا مينيستر بۇل ماسەلەنى شەشە الماسا نەسىنە وتىر؟ الگى اندروپوۆ سياقتى وعان دا بىرەۋ دەر كەزىندە جول سىلتەۋ كەرەك بوپ تۇر-اۋ!
https://t.me/adyrnaportal تەلەگرام ارنامىزعا جازىلىڭىزدار!
