«المامەديا» كينوستۋدياسى شىعارماشىلىق توبىنىڭ جەتەكشىسى، ۇلان شامشەت «قاھارلى قاڭتار» اتتى بەينەفيلم تۇسىرەتىنىن مالىمدەدى دەپ حابارلادى “ادىرنا” ۇلتتىق پورتالى.
«قۇرمەتتى دوستار مەن ارىپتەستەر! «المامەديا» كينوستۋدياسىنىڭ شىعارماشىلىق توبى «قاھارلى قاڭتار» اتتى بەينەفيلمدى تۇسىرۋگە كىرىسەتىنىن حابارلايدى. ءبىز قاڭتار كوتەرىلىسىن ەلىمىزدىڭ ساياسي دامۋ تاريحىنىڭ جاڭا ساتىسى دەپ قابىلدايمىز. ءبىزدىڭ فيلم وسى قاڭتار كوتەرىلىسىنىڭ ساياسي استارىن تولىقتاي سۋرەتتەپ، قوعام نازارىنان تىس قالعان فاكتىلەرمەن تانىستىرادى دەپ ۇمىتتەنەمىز. مەملەكەتىمىزدىڭ قازىرگى قوعامدىق-ساياسي تاريحى – ءبىز جانە كەلەر ۇرپاق ءۇشىن وتە ماڭىزدى. سوندىقتان «قاھارلى قاڭتار» بەينەفيلمىن دايىنداۋعا، جۇرەگى ەلىم دەپ سوعاتىن ازاماتتارىمىزدىڭ اتسالىسۋىن سۇرايمىز!» – دەدى ول.
”ادىرنا” ۇلتتىق پورتالى
