ءماجىلىستىڭ 20 دەپۋتاتىنا جازىقسىز جالا جاپقان كايرات كۋدايبەرگەن كىمدەردىڭ تاپسىرماسىن ورىنداپ وتىر؟!.
اتاسىنىڭ اتىن دا، ءوزىنىڭ اتىن دا قازاقشا جازۋعا ساۋاتى جەتپەيتىن كايرات كۋدايبەرگەن دەگەن بىرەۋ، ءوزى الماتى قالالىق ءماسليحاتى دەپۋتاتى ەكەن، ءوزى “امانات” پارتياسى مۇشەسى نەگە الماتىداعى قازاقتارعا ون سوتىق جەر بەرۋگە قارسى؟
ال ءبىز دە قارىمتا سۇراقتى وسىلاي قويايىق!
قازاقتىڭ ەڭ كوپ باسپاناسىز جۇرگەن جاستارى الماتىدا.
بۇل نەمە باسپاناسىز قازاقتارعا ون سوتىق جەر بەرۋ تۋرالى زاڭنىڭ قالاي ورىندالىپ جاتقانى تۋرالى الماتى قالاسى اكىمدىگىنەن ەسەپ سۇراۋدى ءماسليحاتتا نەگە كوتەرمەيدى؟ ول تۋرالى وسى ۋاقىتقا دەيىن نەگە ويلامايدى؟!.
مۇمكىن، بۇل بايشىكەش نەمەنىڭ ودان دا باسقا “ماڭىزدى” شارۋالاردان قولى تيمەي جۇرگەن شىعار.
بىراق كەشە قاڭتار قىرعىنىندا قازاق جاستارى الاڭعا تەڭدىك سۇراپ شىعىپ، قىرىلىپ جاتقاندا، كەيىن تۇتاس قامالىپ، ازاپتالىپ جاتقاندا، سول جاستاردى قورعاپ ءبىر اۋىز ءسوز ايتقان جوق ءماسليحاتتا. ءبىز استانادان الماتىعا، تارازعا، شىمكەنتكە، تالدىقورعانعا تب قالالارعا كەمىندە ءۇش رەت كەلىپ، تۇرمەگە كىرىپ، ارقايسىسىن جەكە قابىلداپ، جاعدايلارىمەن تانىسىپ، ارىزدارىن اراشا سۇراپ، باس پروكۋراتۋراعا جىبەردىك. اقپان ايىندا ەل ارالاعاندا سول تۇرمەدەن بوساعان جىگىتتەردىڭ اتا-انالارى جىلاپ تۇرىپ راحمەت ايتتى. ول ۆيدەولار “قازاق ۇنى”ۇلتتىق پورتالىندا جاريالاندى.
ال پاراقشاسىنىڭ 75 پايىزى ورىسشا، ۆيدەوسىندا قازاقستانننىڭ مەملەكەتتىك ءتىلىن تاپتاپ، تەك 100 پايىز رەسەيدىڭ مەملەكەتتىك تىلىندە قاقساپ وتىراتىن، جينالىستارىن تەك ورىس تىلىندە جۇرگىزەتىن كايراتيكتىڭ سول قاڭتار قىرعىنىندا “جابايى ارماننىڭ” جانىندا جارباڭداپ، اياعىنا كەبىسىن قويىپ، قولىنا سۋ قۇيىپ جۇرگەنى ينتەرنەتتە تاراپ كەتتى… كەيىن، بۇلار ول جەردەن جوق بولىپ كەتتى دە، قالعان قازاق جاستارى ارانداپ قالدى...
مەن بۇلاردىڭ ءبارىن ايتار ما ەدىم، ايتپاس پا ەدىم، جاقىندا دەپۋتات بلوگەر، كايرات حايپاجور وتىرىكتى شىنداي، شىندى قۇداي ۇرعانداي ەتىپ، ءبىراز وتتاپتى.
پارلامەنتتە ءبىز، ءماجىلىستىڭ جەتىنشى شاقىرىلىمى دەپۋتاتتارى كەلمەي جاتىپ، 2020 جىلى بۋكمەككەرلىكتى قولداعان زاڭ قابىلدانىپ كەتكەنىنە پارلامەنتكە ودان ءبىر جىل كەيىن، 2021 جىلى كەلگەن ءبىزدى، الەۋمەتتىك-مادەني كوميتەتتىڭ 20 دەپۋتاتىن كىنالاپ شىعىپتى…
1.بىرىنشىدەن، ول بۋكمەككەرلىك تۋرالى زاڭ بىزگە دەيىن بۇرىنعى التىنشى شاقىرىلىم كەزىندەگى قۇرامدا 2020 جىلى دايىندالعان.
2.ەكىنشىدەن، ول زاڭ بۇرىنعى قۇرامدا قابىلدانسا دا، كايراتيك بوسقا جالا جاۋىپ جاتقانداي، الەۋمەتتىك-مادەني كوميتەتتە ەمەس، ەكونوميكالىق كوميتەتتە قابىلدانعان.
سوندا مۇنى، پارلامەنت سايتىن اشا سالسا دا، گۋگلدەن قاراي سالسا دا مەكتەپ بالاسى دا بىلە الاتىن مالىمەتتى ءماسليحات دەپۋتاتى كايرات مىرزانىڭ بىلمەۋى ، بۇل بارىپ تۇرعان ساۋاتسىزدىق! الماتىداي ساياسي-مادەني وردانىڭ ءماسليحاتى دەپۋتاتىنىڭ اتىنا ۇيات جاۋاپسىزدىق!
الدە، ءبىلىپ تۇرسا دا، لاقتىرعان تاسىن ەكونوميكا كوميتەتىنەن الەۋمەتتىك-مادەني كوميتەتكە بۇرا سالۋى، اقشانىڭ ءيىسى شىققان جەرگە اياعىن اڭداپ باساتىن بايشىكەش نەمە ەرتەڭ تەندەر-پەندەر دەگەندەي، ەكونوميكا كوميتەتىنە ءىسى ءتۇسىپ قالاتىن بولعاسىن، اتىنا كىر كەلتىرمەي، اينالىپ وتكەن بولار… سوندا بۇرىنعى بيلىكپەن بىتە قايناسقان، بۇرىنعى نۇروتاننىڭ، قازىرگى “اماناتتىڭ” دەپۋتاتى كايراتيك كىمدەردىڭ اماناتىن، ياعني تاپسىرىسىن ورىنداپ وتىر؟!.
3.ۇشىنشىدەن، تۋرا وسى الەۋمەتتىك-مادەني كوميتەت دەپۋتاتى Elnur Beisenbaev بۋكمەككەرلىككە قارسى دەپۋتاتتىق ساۋال جاريالادى كوميتەت اتىنان.
4. تورتىنشىدەن، قازىر الەۋمەتتىك-مادەني كوميتەتتە جاستار تۋرالى زاڭ قارالىپ جاتىر. سول بىزگە دەيىن قابىلدانعان بۋكمەككەرلىكتى قولدايتىن باپقا وسى زاڭ جوباسىندا توسقاۋىل قويىلماقشى. ياعني، كايرات كۋدايبەرگەن الەۋمەتتىك-مادەني كوميتەتى دەپۋتاتتارىنا جالا جابۋدىڭ ورنىنا العىس ايتىپ، قولداۋى كەرەك ەمەس پە، قيىننان قيىستىرىپ جاتقاندارى ءۇشىن، ەگەر شىنىمەن بۋكمەككەرلىككە قارسى بولسا؟!. جوق، ونىڭ بۇل ايباراق تىرلىگى ادەتتەگىدەي كوزبوياۋشىلىق پا؟!.
مەيلى عوي، سوعا بەرسىن، ساناسى سوعان جەتسە، ساعىزىن شايناي بەرسىن كايرات مىرزا. ءيا، شايناي بەرسىن، بىراق حالىققا جالعان اقپارات بەرەتىندەي، اداستىراتىنداي، ولاردى قاسيەتتى ورازا كەزىندە جازىقسىز دەپۋتاتتارعا بالاعات ايتقىزىپ، كۇناھار قىلاتىنداي، قاراپايىم حالىقتىڭ نە كىناسى بار؟
ايتپەسە، بۇعان “امانات” پارتياسى ءوز ارىپتەستەرىن جازىقسىز جامانات ەتۋ ءۇشىن عانا بەرگەن جوق قوي دەپۋتاتتىق مانداتتى؟!.
ايتپاقشى، بۇل نەمە قارالاعان ماجىلىستەگى الەۋمەتتىك-مادەني كوميتەتىنىڭ 20 دەپۋتاتىنىڭ 99 پايىزى، ياعني، “امانات” پارتياسىنىڭ 19 دەپۋتاتى ماسليحاتتاعى پارتيالاستارى كايرات كۋدايبەرگەندى جالا جاپقانى ءۇشىن ماسەلەسىن مايشاممەن قاراۋعا پارتيا باسشىلارىنا ارىز جازۋدا… سوتقا بەرىپ تە قالۋى بەك مۇمكىن…
قاڭتار قىرعىنىندا ەڭ كوپ زارداپ شەگۋ، ەڭ كوپ قۇرباندىق، ەڭ كوپ تۇرمەگە ءتۇسۋ الماتى قالاسىندا بولدى. سوندىقتان دا دەپۋتات كايرات كۋدايبەرگەن ارانداپ، تۇرمەگە ءتۇسىپ، جازىقسىز ازاپتالعان قازاق جاستارىنىڭ جاعدايىن ايتىپ، ءماسليحاتتا كوتەرۋگە بولادى عوي؟ ونىڭ ۇستىنە ول ءوزى تاعى قر پرەزيدەنتى جانىنداعى جاستار ساياساتى كەڭەسىنىڭ مۇشەسى!؟.
ال ءبىز جاڭاوزەن ەرەۋىلى باستالعاننان باستاپ بەيبىت شەرۋشىلەردى قولداپ، جازىقسىز تۇتقىندالعان جاستارعا اراشا ءتۇسىپ، كۇندە ەفيرگە شىعىپ، ونشاقتى ماقالا جازىپ، پارلامەنتتە ءۇش رەت كوتەردىك. اقىرىندا 14 ناۋرىز كۇنى باس پروكۋروردان باستاپ، بۇكىل كۇشتىك قۇرىلىمدار، قۇزىرەتتى ورگاندار باسشىلارىن پارلامەنتتە ەسەپ بەرگىزۋگە قول جەتكىزدىك.
ءبىز الماتىعا كەلىپ، اقپاننىڭ ايازىندا سۋىق تۇرمەلەردى ارالاپ، جازىقسىز تۇتقىندالعانداردى بوساتىپ، ولاردىڭ جىلاپ جۇرگەن اتا-انالارىن جۇباتىپ جۇرگەندە، كايرات مىرزا دۋبايدا كۇنگە قىزدىرىنىپ، شومىلىپ، جاعاجايدا شاعىلدا شالقاسىنان جاتىپ، ديكي ارماننىڭ اتقوسشىسى بولىپ جۇرگەندىكتەن جاۋاپ الۋعا شاقىرعان قۇقىق قورعاۋ ورىندارىنا الەۋمەتتىك جەلىدەن سالەم جولداپ جاتادى… قالاي ءومىر ءسۇرۋدى بىلەدى، ارينە!
كايراتيكتىڭ دەپۋتاتتارعا جالا جاپقان فەيسبۋك پەن ينستاگرام پوستىنىڭ استىندا كوزى اشىق ەل ءبىزدى قولداپ، كوپتەگەن پىكىر جازۋدا. “ەل قامىن ويلاپ، ءتىل زارىن ايتىپ جۇرگەن اقىن قازىبەك يسانىڭ ونداي زاڭدى قولداۋى مۇمكىن ەمەس”، “امانجول ءالتاي كەشە عانا كەلدى ەمەس پە، قالاي ونداي زاڭدى قابىلداپ ۇلگەرگەن؟”-دەگەن، تب بەلسەندى دەپۋتاتتارىمىزدى دا اراشالاپ جاتقان حالىقتىڭ پىكىرلەرىندە كايراتبايدىڭ شارۋاسى دا جوق! ءتىپتى مەنىڭ ونىڭ اتىن بەلگىلەپ تۇرىپ جازعان: “مەن بۋكمەكەرلىككە باياعىدان قارسىمىن جانە “قازاق ءۇنى” گازەتىندە بۇعان قارسى ماقالا دا جازعانبىز! سوندىقتان، كايرات كۋدايبەرگەن مىرزا، بۇنداي كۇماندى ءتىزىم جاساپ، وعان مەنىڭ، ءبىزدىڭ اتىمىزدى قوسۋىڭىز، بىرىنشىدەن قىپ-قىزىل جالا، ويتكەنى كوميتەت بۇنداي زاڭ قابىلداعان جوق، ەكىنشىدەن ەشقانداي ەتيكاعا سىيمايدى. سوندىقتان، مەنىڭ اتىمدى، ياعني تۇگەل ءتىزىمدى الىپ تاستاۋىڭىزدى تالاپ ەتەمىن!
بىزگە ونداي زاڭ كەلگەن جوق جانە ەشكىم مەنەن ول تۋرالى پىكىرىمدى سۇراعان ەمەس."-دەگەن جازباما دا جىلتىراعان بەتى ءبىر بىلق ەتپەدى-اۋ سابازدىڭ…
بۇل نەمەنىڭ بىزگە، دەپۋتاتتارعا تاعاتىن كىناسىن قاراساڭىز كۇلكىڭىز كەلەدى…
ء“دال وسى كىسىلەر بۋكمەككەرلەردىڭ، لوتو، بينگولاردىڭ مۇددەلەرىن قورعاپ ءجۇر. قالاي قولداپ ءجۇر دەسەڭىز، ەڭ بىرىنشىدەن وسى سۇراق بويىنشا نەمقۇرايلىعىمەن”-دەپ سوعىپ وتىر بازارداعى سىعان قاتىندارداي سىپىلداپ بال اشىپ…
ال بۇنداي جالا بۇدان بىرەر جىل بۇرىن بۋكمەككەرلەرگە قارسى ماقالا جازعان ءبىزدى كۇيدىرىپ جىبەرەتىن قارالاۋ عوي!
وسىدان ەكى جىل بۇرىن مەملەكەت قازىناسىنان تريلليون ۇنەمدەگەنى ءۇشىن تۇرمەگە تۇسكەن بەلگىلى قايراتكەر يسلام ابىشەۆكە جالاقور تەرگەۋشىلەر مەن سولاقاي سوتتاردىڭ تاققان ايىبىن وقىپ، تاڭعالىپ ەدىك. “ول پارا الۋعا وقتالدى نەمەسە پارا الۋدى ويلادى”-دەگەن باپ تا بولادى ەكەن ءبىزدىڭ قىلمىس كودەكسىندە)))). سونداي سوراقى ايىپتاۋمەن بەس جىل ارقالاتىپ جىبەرگەن ەدى… كەيىن سول سوتىڭ دا، ارانداتۋشى تەرگەۋشىڭ دە، جالا جابۋشى جاندايشاپتار دا وزدەرى قىلمىس ۇستىندە ۇستالىپ، سوتتالىپ كەتتى. ەندى ءبىرى شەتەلدە قاشىپ ءجۇر… ال يسلام اعامىز ماڭدايى جارقىراپ ەلدىڭ ورتاسىندا ءجۇر. قۇداي بار دەگەن وسى ەكەن عوي!
سول سەكىلدى قۇداي قۇدايبەرگەنۇلىن سوت نە تەرگەۋشى قىلماعانىنا قۇدايعا شۇكىر. ايتپەسە، بىزدەن ەكى جىل بۇرىن قابىلدانىپ كەتكەن زاڭدى سول كەزدە ءبىز دەپۋتات بولماساق تا، ايدالادا ءجۇرىپ، “نەمقۇرايلىلىقپەن قولداعانىمىز” ءۇشىن قانشاما جىل ارقالاپ كەتەر ەدىك))).
“ەستىمەگەن ەلدە كوپ” دەگەن وسى!))).
“بىرەۋگە كۇيە جاقساڭ، ءوز قولىڭ قاپ-قارا بولادى”-دەگەندەي، بىرەۋ ەمەس 20 پارلامەنت دەپۋتاتىنا كۇيە جاعىپ، قولدارى ابدەن قاپ-قارا بولعان كايرات كۋدايبەرگەن قۇدايدىڭ الدىندا قالاي اقتالادى ەكەن ەرتەڭ؟..
قۇدايعا قۇلشىلىق جاسايتىن قاسيەتتى رامازان ايىندا بىرەۋمەن ۇرىسۋ تۇگىلى ەشكىمگە وكپەلەۋگە، رەنجۋگە بولمايدى. قايتا بۇرىن رەنجىسىپ جۇرگەن ادامدار ءبىر-بىرىمەن كەشىرىم سۇراسىپ، تاتۋلاسۋى ءتيىس!
بىراق كۋدايبەرگەننىڭ قۇداي بەرگەن بالاسىنىڭ قۇدايدا دا شارۋاسى جوق سياقتى…
“قۇدايدان قورىقپاعاننان قورىق” دەگەندى تاۋىپ ايتقان اتام قازاق دانا عوي…
قاسيەتتى رامازان ايى بولعاندىقتان، مەن بىزگە جالا جاپقان كايرات كۋدايبەرگەنگە دەگەن رەنىشىمدى وسىمەن كەشتىم…
جالپى، وعان بولا رەنجۋگە دە تۇرمايتىن بىرەۋ ەكەنىنە كوزىم جەتتى، پاراقشاسىن قاراپ وتىرىپ…
ال “اماناتتىقتار” ءوز ارىپتەستەرىن نە ىستەيتىنىن، ءماسليحاتتا بايلىقتىڭ بۋىنا ماستانىپ، ەشكىمدى تىڭدامايتىن، ويىنا نە كەلسە، سونى ىستەپ، اۋزىنا نە كەلسە، ويلانباي سونى ايتا سالاتىن دەپۋتاتتارىن ورنىنا قويا ما، جوق، “اقشاڭ بولسا قالتاڭدا- تالتاڭداساڭ، تالتاڭدا” دەگەندەي تايراڭداتىپ قويا بەرە مە، ونى وزدەرى ءبىلسىن. بۇل ولاردىڭ وزدەرىنىڭ پارتيالىق ىشكى شارۋالارى.
ون ەكى ايدىڭ سۇلتانى - قاسيەتتى رامازان ايىندا ۇستاعان ورازامىز قابىل بولسىن!
ەل امان، جۇرت تىنىش بولسىن!
قازىبەك يسا
Facebook پاراقشاسىنان
