ەندى ءبىر ادامنىڭ بىرنەشە بانكتەن نەسيە الۋىنا بولمايدى، دەپ حابارلايدى “ادىرنا” ۇلتتىق پورتالى.
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبiر زاڭنامالىق اكتiلەرiنە ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ ماسەلەلەرى بويىنشا وزگەرiستەر مەن تولىقتىرۋلار ەنگiزۋ تۋرالى» زاڭ جوباسى ماقۇلداندى.
«بۇگىندە نەسيە الۋ سالاسىندا كوپتەگەن الاياقتىق جاعدايلارى كوپ كەزدەسەدى. ءاربىر قارجىلىق ۇيىم نەمەسە ەكىنشى دەڭگەيدەگى بانكتەر بەرىلگەن نەسيەلەر تۋرالى كرەديتتىك بيۋروعا جولدايدى، وندا بەرىلگەن نەسيەلەردىڭ بازاسى 15 كۇننىڭ ىشىندە قالىپتاسادى. ءبىزدىڭ تۇزەتۋلەرگە سايكەس، نەسيە بەرۋ اقپاراتتارى ءبىر كۇننىڭ ىشىندە تىركەلەدى. ەندى، ءبىر-ەكى كۇننىڭ ىشىندە 5-6 بانكتە ءبىر مەزگىلدە نەسيە الۋعا تىرىسقان ادامداردا مۇنداي مۇمكىندىك بولمايدى.
ەكىنشى بانك قايتادان نەسيە الۋعا كەلگەن ادامنىڭ مۇمكىندىگىن قاراپ، ونىڭ تابىسى نەسيەنى وتەۋگە جەتپەيتىنىن كورىپ، ونىڭ ءوتىنىشىن ماقۇلدامايدى. سونىمەن قاتار، بۇل قادامدار ينتەرنەت-الاياقتىققا دا توسقاۋىل قويادى»، – دەدى دانيا ەسپاەۆا.
”ادىرنا” ۇلتتىق پورتالى
