ۋكراينا پرەزيدەنتى ۆلاديمير زەلەنسكي رەسەي اگرەسسور ەلىنىڭ بيلىگى جاھاندىق ينستيتۋتتار مەن الەمدىك قۇندىلىقتاردى قۇرمەتتەمەيتىنىن حابارلادى. بۇل تۋرالى مەملەكەت باسشىسى بۇۇ باس حاتشىسى انتونيۋ گۋتەرريشپەن كەزدەسۋدەن كەيىنگى كەشكى ۇندەۋىندە ايتتى، دەپ جازادى "ادىرنا" ۇلتتىق پورتالى.
زەلەنسكي بۇۇ وكىلىنىڭ بۋچا مەن بوروديانكاعا ساپارى رەسەي فەدەراتسياسى ارمياسىنىڭ ۋكرايناداعى ارەكەتتەرىنىڭ اۋىرلىعىن ءتۇسىنۋ ءۇشىن وتە ماڭىزدى ەكەنىن اتاپ ءوتتى.
«ۋكرايناداعى رەسەي ارمياسى ەكىنشى دۇنيەجۇزىلىك سوعىستان كەيىن جاھاندىق ءتارتىپ نەگىز بولعان بارلىق نارسەنى: بۇۇ جارعىسىن، حالىقارالىق كونۆەنتسيالاردى، دەكلاراتسيالاردى، ادامدار مەن مەملەكەتتەردىڭ قۇقىقتارىن ادەيى جانە ءسوزسىز تاپتادى. الەمدەگى ەركىندىك پەن قاۋىپسىزدىككە كەپىلدىك بەرۋى ءتيىس نارسەنىڭ ءبارى رەسەيدىڭ اگرەسسيۆتى ارەكەتتەرىمەن جويىلدى»، - دەدى مەملەكەت باسشىسى.
مەملەكەت باسشىسى 28 ساۋىردە كيەۆكە جاسالعان زىمىراندىق شابۋىل رەسەيدىڭ حالىقارالىق قۇقىق پەن الەمدىك ۇيىمدارعا دەگەن شىنايى كوزقاراسىن كورسەتەتىنىن اتاپ ءوتتى.
«كيەۆتەگى كەلىسسوزدەرىمىز اياقتالعاننان كەيىن بىردەن قالاعا رەسەيلىك زىمىراندارى ۇشتى. بەس زىمىران. بۇل رەسەيدىڭ جاھاندىق ينستيتۋتتارعا دەگەن شىنايى كوزقاراسى، رەسەي باسشىلىعىنىڭ بۇۇ-نى جانە ۇيىم ۇسىناتىن بارلىق نارسەنى قورلاۋ ارەكەتتەرى تۋرالى كوپ نارسەنى ايتادى. دەمەك بۇل ءتيىستى كۇشتى رەاكتسيا قاجەت دەگەندى بىلدىرەدى»، - دەدى زەلەنسكي.
"ادىرنا" ۇلتتىق پورتالى
