تاجىكستاننىڭ ۇجىمدىق قاۋىپسىزدىك تۋرالى شارت ۇيىمىنان اسكەري كومەك سۇراعانى تۋرالى اقپارات تارادى. ەلدىڭ سىرتقى ىستەر مينيسترلىگى بۇل اقپاراتقا قاتىستى رەسمي مالىمدەمە جاسادى، دەپ حابارلايدى «ادىرنا» ءتىلشىسى.
Reuters تاراتقان مالىمەتكە سۇيەنسەك، تاجىكستان اۋعانستانمەن شەكاراداعى قاۋىپتىڭ كۇشەيۋىنە بايلانىستى الاڭداۋشىلىق بىلدىرگەن.
«دۋشانبە رەسەي جانە ۇقشۇ ەلدەرىمەن اۋعانستان باعىتىن كۇشەيتۋ ماسەلەسىن تالقىلاپ جاتىر. سوڭعى اپتالاردا شەكارا ماڭىندا بىرنەشە قارۋلى شابۋىل بولىپ، سالدارىنان قازا تاپقاندار مەن جارالانعاندار سانى وسكەن. وسى وقيعالاردان كەيىن تاجىكستان قاۋىپسىزدىك كۇشتەرىن كۇشەيتۋ قاجەتتىگىن مالىمدەپ، ۇيىمنان اسكەري قولداۋ سۇراعان»،-دەلىنگەن حابارلامادا.
الايدا تاجىكستان ءسىم بۇل اقپاراتتى جوققا شىعاردى.
«مينيسترلىك اتالعان جاريالانىمنىڭ شىندىققا جاناسپايتىنىن، مۇنداي جالعان اقپاراتتىڭ تارالۋى حالىقارالىق اۋديتوريانى شاتاستىراتىنىن اتاپ وتەدى»،–دەلىنگەن حابارلامادا.
ۆەدومستۆونىڭ ايتۋىنشا، تاجىكستان ۇنەمى مەملەكەتتىك شەكارانى سەنىمدى قورعاۋعا باعىتتالعان بارلىق قاجەتتى شارانى قابىلداپ كەلەدى.
«مەملەكەتتىك شەكاراداعى جاعداي تۇراقتى ءارى تاجىكستان رەسپۋبليكاسىنىڭ قۇزىرلى ورگاندارىنىڭ تولىق باقىلاۋىندا», – دەپ حابارلادى مينيسترلىك.
