تاجىكستاندا تەرروريستەرمەن بولعان قارۋلى قاقتىعىستان ەلدىڭ شەكارا اسكەرىنىڭ ەكى اسكەري قىزمەتكەرى قازا تاپتى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
وقيعا شامسيددين شوحين اۋدانىنداعى 0341 «سارچاشما» شەكارا جاساعىنا قاراستى №5 «ساد» شەكارا بەكەتىندە بولعان.
23 جەلتوقسان كۇنى ساعات 23:30 شاماسىندا بەلگىسىز تەرروريستىك ۇيىمعا تيەسىلى ءۇش ادام اۋعانستان تاراپىنان مەملەكەتتىك شەكارانى زاڭسىز كەسىپ وتكەن. كەلەسى كۇنى، 24 جەلتوقساندا ساعات 11:15-تە ولاردىڭ جۇرگەن جەرى انىقتالعان.
شەكاراشىلاردىڭ بەرىلۋ تۋرالى تالابىنا قارۋلى توپ وق اتىپ جاۋاپ بەرگەن. قارسىلىق بىلدىرگەن ءۇش ادام قازا تاپتى.
ەلدىڭ قاۋىپسىزدىك قىزمەتىنىڭ مالىمەتىنشە، كۇدىكتىلەر تاجىكستان شەكارا بەكەتتەرىنىڭ بىرىنە شابۋىل جاساۋدى جوسپارلاعان.
قاقتىعىس ورنىنان م-16 ۇلگىسىندەگى ءۇش ۆينتوۆكا، ءبىر كالاشنيكوۆ اۆتوماتى، دىبىس باسەڭدەتكىشتەرى بار شەتەلدىك وندىرىستەگى ءۇش تاپانشا، سونداي-اق ون قول گراناتاسى تابىلىپ، تاركىلەندى.
سونىمەن قاتار تۇنگى كورۋ قۇرىلعىلارى، جارىلعىش زاتتار مەن ءتۇرلى وق-دارىلەر انىقتالعان.
ارنايى وپەراتسيا بارىسىندا تاجىكستاندىق ەكى اسكەري قىزمەتكەر قازا تاپتى. شەكارا اسكەرلەرى قىزمەتتىك بورىشىن اتقارۋ كەزىندە قازا بولعان ساربازداردىڭ وتباسىلارىنا كوڭىل ايتتى.
ۇقمك سوڭعى ءبىر اي ىشىندە اۋعانستان اۋماعىنان كەلگەن نەمەسە سول جاقتا ورنالاسقان قارۋلى توپتاردىڭ قاتىسۋىمەن بولعان بۇل ءۇشىنشى شابۋىل ەكەنىن اتاپ ءوتتى.
