وتان قورعاۋشىلار كۇنى قارۋلى كۇشتەردىڭ مەملەكەتتىك اسكەري-تاريحي مۋزەيىندە ۇلى وتان سوعىسى جىلدارىنداعى مۇراعات قۇجاتتارىن سالتاناتتى تۇردە مۋزەي قورىنا تاپسىرۋ ءراسىمى ءوتتى، دەپ حابارلايدى «ادىرنا» ءتىلشىسى ۆەدومستۆونىڭ ءباسپاسوز قىزمەتىنە سىلتەمە جاساپ.
دوكۋمەنتاليست، ساراپشى اقمارال باتالوۆا ولاردى رەسەي فەدەراتسياسى قورعانىس مينيسترلىگىنىڭ ورتالىق مۇراعاتىنان الدى.
اتالعان بىرەگەي ماتەريالدار 1945 جىلى 30 ساۋىردە رەيحستاگقا جاۋىنگەرلىك تۋ تىككەن راقىمجان قوشقارباەۆ پەن گريگوري بۋلاتوۆتىڭ ەرلىگىنىڭ ايعاعى.
ءىس-شاراعا قازاقستان تاراپىنان باس شتاب باستىعىنىڭ ورىنباسارى – تاربيە جانە يدەولوگيالىق جۇمىستار دەپارتامەنتىنىڭ باستىعى گەنەرال-مايور سەرىك بورامباەۆ قاتىستى. رەسەي فەدەراتسياسىنىڭ اتىنان قازاقستان رەسپۋبليكاسىنداعى توتەنشە جانە وكىلەتتى ەلشى الەكسەي بوروداۆكين بولدى.
– بۇل وقيعا تاۋەلسىز قازاقستاننىڭ قارۋلى كۇشتەرى ءۇشىن عانا ەمەس، بۇكىل ەل ءۇشىن ماڭىزدى. راقىمجان قوشقارباەۆ پەن گريگوري بۋلاتوۆتىڭ ەرلىگى – جالپىعا ءمالىم فاكت، دەگەنمەن ەندى اسكەري مۋزەيدە ولاردىڭ باتىرلىعى مەن قايسارلىعىن ايعاقتايتىن قۇجات ساقتالادى، – دەدى گەنەرال-مايور سەرىك بورامباەۆ.
قاتىسۋشىلار وسىنداي شارا ۇلى وتان سوعىسىنىڭ باتىرلارىن ماڭگى جادىمىزدا ساقتاۋ ءۇشىن ماڭىزدى وقيعا جانە وسكەلەڭ ۇرپاقتى اسكەري-پاتريوتتىق تاربيەلەۋدەگى الار ورنى ەرەكشە ەكەنىن اتاپ ءوتتى.
«ادىرنا» ۇلتتىق پورتالى
