24 مامىر – م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ مۋزەيىنىڭ قۇرىلعان كۇنى. تەاتر مۋزەيىنە 50 جىل تولىپ وتىر.
وسى ايتۋلى داتاعا وراي «تەاتر مۋزەيىنىڭ ءتۋنى» وتەدى. كەلىڭىزدەر، مۋزەي ءتۇنىن بىرگە تاماشالايىق! مۋزەي – حالىقتىڭ تاريحي تانىمىنىڭ شەجىرەسى، ءتۇرلى وقيعالار مەن كەزەڭدەردىڭ، ۇمىتۋعا بولمايتىن ساتتەردىڭ كۋاگەرى. مۇنداعى ءار زاتتىڭ وزىندىك تاريحى بار. م.اۋەزوۆ تەاترىنىڭ مۋزەيى جارتى عاسىر ۋاقىت ىشىندە ءوزىنىڭ جادىگەرلەرىن تولىقتىرۋدان بولەك، حالىقتى تەاتردىڭ وتكەنىمەن تانىستىراتىن، اياۋلى دا ارداقتى اكتەرلەردىڭ ءومىرناماسىنىڭ ەل بىلە بەرمەيتىن بەتتەرىن جيناقتاپ، كورەرمەنگە جەتكىزەتىن ايرىقشا بەدەلگە يە بولا ءبىلدى.
مۋزەيدىڭ اشىلۋ تاريحى تۋرالى ايتقاندا، بەلگىلى اكتەر، حالىق ءارتىسى قاپان بادىروۆتىڭ «ەستەن كەتپەس ەسىمدەر» اتتى كىتابىنداعى «تاريح قويماسى» اتتى ماقالاسىنداعى مىنا جولدار ويعا ورالادى: «العاشقى اشىلعان تەاتردى زور قۋانىشپەن قارسى العان قازاق ەلى سونشا كوپ سىيلىقتار تارتتى. كىلەم، تۇسكيىز، قاسقىر ىشىك، تۇلكى ىشىك، تۇلكى تىماق، تۇيە ءجۇن شەكپەن، قۇندىز بورىك، جىبەك شاپان، كۇمىس ەر توقىم، سىرلى اياق، كۇمىس وجاۋ، اعاش شارا، سارى توستاعاندار، داستارقاندار، اشا باقان، كۇمىس كىسە، جىبەك بەلبەۋ، ءارتۇرلى ورىلگەن قامشى تەاتر قۇرمەتىنە تارتىلعان-دى. ال، قىزدار كيەر ۇكىلى تاقيا، كامشات بورىك، ساۋكەلە، وقالى شاپان، كەستەلى كويلەك، ومىراۋىنا ءتۇرلى تەڭگە تاققان كامزول، سىلدىراعان شولپى، بىلەزىك، بالداقتاردىڭ تالايى سىيعا كەلگەنىن بىلەمىز»، – دەپ جازا كەلە، سونىڭ ءبارىنىڭ قادىرىنە جەتە بىلمەگەندىكتەرىنە وكىنىش بىلدىرەدى. سەبەبى، حالىق سىيعا تارتقان وسىنشاما مۇرا-جادىگەرلەر مۋزەي بولماعاندىقتان توزىپ، ىسكە العىسىز دۇنيەگە اينالعان.
ەگەر 1926 جىلدان بەرگى بارلىق ەكسپوناتتار ساقتالعان بولسا، كورەرمەنگە تارتۋ ەتەر قۇندى دۇنيە تىپتەن مول بولار ەدى. بۇگىندە مۋزەي قورى قازاقستانداعى وزگە تەاترلاردان كوش ىلگەرى، مۇنداعى زاتتاردىڭ سان الۋاندىعى، تاريحي قۇنى اسا جوعارى باعالى دۇنيەلەردىڭ مولدىعى كوڭىلگە مەدەۋ. سول جىلدارى قاپان بادىروۆ، نۇرمۇحان ءجانتورين، ءسابيرا مايقانوۆا، شاكەن ايمانوۆ، حاديشا بوكەەۆا، شولپان جانداربەكوۆا، ءاسانالى ءاشىموۆ، ەسمۇقان وباەۆ، اۋباكىر راحيموۆ باستاعان اعا-اپالارىمىز بار كۇشىن سالىپ، جادىگەرلەردىڭ جيناقتالۋىنا، كوبەيۋىنە، ولاردىڭ حرونولوگيالىق تارتىپپەن رەتتەلۋىنە زور ۇلەس قوسقان. ەگەر، كىمدە-كىم تەاتر مۋزەيىن كەلىپ كورسە، 92-جىلدىق تاريحى بار قاراشاڭىراقتىڭ تاريحىمەن كەزەڭ-كەزەڭىمەن تانىسا الادى. ەلىمىزگە بەلگىلى تەاتر مەترلەرىنىڭ 30-دان استام مايلى بوياۋمەن سالىنعان پورترەتتەرى قاز-قاتار ءتىزىلىپ، ءىلىنىپ تۇر. اكتەرلەردىڭ ءار جىلدارى، ءارتۇرلى قويىلىمداردا كيگەن كاستيۋمدەرىن ءبىزدىڭ باعا جەتپەس بايلىعىمىز دەسەك تە بولادى. مۋزەي جۇمىس ىستەگەننەن بەرگى زەرلى، اسىل ماتادان تىگىلگەن كيىم ۇلگىلەر بار. بۇدان بولەك، ارتىستەردىڭ مەدالدارى، ماراپاتتارى، العىس حاتتارى، قولدانعان بۇيىمدارى ساقتاۋلى. ءار سپەكتاكلدەن تۇسىرىلگەن فوتولاردىڭ قورى تىپتەن مول. فوتولار مۇراسىنا ۇڭىلگەن كەزدە، سوناۋ تەاتر قۇرىلعان جىلداردان باستاپ، كۇنى بۇگىنگە دەيىنگى كەزەڭدى قامتيتىن، رەجيسسەرلەر، اكتەرلەر، باسشىلار، تەحنيكالىق قىزمەتكەرلەر، باسقا دا تەاترعا قاتىستى بەينەلەرگە جولىعاسىز. ولاردىڭ شاعىن ءومىربايانى، ءار جىلداردا قويىلعان سپەكتاكلدەردەگى رولدەرى، سان سالالى بۇقارالىق اقپارات قۇرالدارىنا بەرگەن سۇحباتتارى مەن ولار جايلى جازىلعان اقپاراتتار، ماقالالار، زەرتتەۋلەر، ەسسەلەر مەن وچەركتەر، ساحنا جانە گاسترولدەگى، ءتۇرلى مادەني شارالار تۇسىنداعى سۋرەتتەرى، دراماتۋرگتەردىڭ ساحنالانعان جانە تەاتردىڭ كوركەمدىك كەڭەسىنە ۇسىنعان پەسالارى، ت.ب. جيناقتالعان. بەلگىلى اكتەرلەردىڭ ءوزى تۇتىنعان زاتتارى، اشەكەي بۇيىمدارى، كەيبىر كۇندەلىكتەرى مەن قولجازبالارى، تىلەكتەرى دە تابىلادى.
باستالۋى ساعات 20.30
وتەتىن ورنى – م. اۋەزوۆ دراما تەاترى
م.اۋەزوۆ اتىنداعى قازاق مەملەكەتتىك
اكادەميالىق دراما تەاترىنىڭ مۋزەي ءبولىمى
