«بالالار جىلى» اياسىندا ەلوردادان 30 مينۋتتىق جەردە «قىزىلجار» ورمان شارۋاشىلىعى اۋماعىندا «سارجايلاۋ» ەتنولاگەرى اشىلدى، دەپ حابارلايدى «ادىرنا» ۇلتتىق پورتالى.
«كۇنى كەشەگى ءدىني جات اعىم وكىلدەرىنىڭ ارەكەتى ارالاسىپ كەتكەن «قاڭتار قاسىرەتى» حالقىمىزدىڭ قابىرعاسىن قايىستىرىپ، ەلىمىزدى دۇرلىكتىرىپ، مەملەكەت تىنىشتىعىن بۇزدى. قانشاما جاس قىرشىنىنان قيىلىپ، قانشا انا زارلاپ قالدى. بۇگىندە جاستارىمىزدىڭ اراسىندا ۇلتىنىڭ قۇندىلىعىنان بەزىپ، ءدىنى مەن دىلىنەن اجىراپ قالعاندار بارشىلىق. بۇل رۋحاني ازعىندىقتىڭ اۋىر سالدارى قوعامدا ءدىن ماسەلەسىنە، ءدىل ماسەلەسىنە «شاممەن قاراۋ» كەرەكتىگىمىزدى ۇقتىردى. ۇرپاقتىڭ رۋحاني-ونەگەلىك تاربيەسىنە ءجىتى قاراۋ كەرەكتىگىن كورسەتتى. بۇل وقيعا كوكىرەك كوزى وياۋ، ۇرپاعىنىڭ بولاشاعىن، ەلىنىڭ ەرتەڭىنە الاڭدايتىن جاننىڭ بارلىعىنا وي سالدى. ءبىزدىڭ ەتنولاگەردىڭ نەگىزگى ماقساتى - ەل ەرتەڭى بولار وسكەلەڭ ۇرپاقتىڭ بويىنا ۇلتتىق قۇندىلىقتاردى ءسىڭىرىپ، ۇلت تاريحىنا، اتا جۇرتىنا، اتا تەگىنە، انا تىلىنە دەگەن سۇيىسپەنشىلىگىن وياتىپ، وتانىن شەكسىز سۇيەتىن جانە قازاق بولعانىن ماقتانىش ەتەتىن ازات ويلى، تاۋەلسىز ۇرپاق تاربيەلەپ، ۇلتتىڭ ساناسىن قالىپتاستىرۋ»، - دەيدى «سارىجايلاۋ» ەتنولاگەرىنىڭ نەگىزىن قالاۋشىلاردىڭ ءبىرى – بەلگىلى قوعام قايراتكەرى، «قارا شاڭىراق» ۇلتتىق تاربيە بەرۋ جوباسىنىڭ اۆتورى، تاريحشى-ەتنولوگ تۇرار ساتتارقىزى.
ەتنولاگەردىڭ اشىلۋ راسىمىنە ۇلت بولاشاعىنا بەي-جاي قارامايتىن، كەلەر ۇرپاق الدىندا جاۋاپكەرشىلىك جۇگىن سەزىنەتىن بىرقاتار ەل جاناشىرلارى قاتىستى. ونىڭ ىشىندە قر پارلامەنتى ءماجىلىسىنىڭ دەپۋتاتى، حالىقارالىق «قازاق ءتىلى» قوعامىنىڭ پرەزيدەنتى بەرىك ابدىعاليۇلى، Elorda-Aqparat مەدياحولدينگى ديرەكتورىنىڭ ورىنباسارى، حالىقارالىق «قازاق ءتىلى» قوعامىنىڭ ەلوردالىق فيليالىنىڭ توراعاسى قانات اۋەسباي، بەلگىلى ەتنوديزاينەر، «التىن وردا» اۆتورلىق ديزاين ءۇيىنىڭ نەگىزىن قالاۋشى ىرزا تۇرسىنزادا، قالا اكىمدىگىنىڭ وكىلدەرى، نۇر-سۇلتان قالاسى اكىمدىگىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرى قاتىستى.
«الدىڭعى جاقسى ارتقى جاسقا ءتالىم ايتپاسا، ەل بولعانىڭ قايسى؟!»، - دەپ مۇحتار اۋەزوۆ تايعا تاڭبا باسقانداي ايتىپ كەتكەندەي، ءبىز ەلىمىزدىڭ ەرتەڭگى تۇتقاسى، ۇلت بولاشاعى سانالاتىن جاس تولقىن الدىنداعى زور جاۋاپكەرشىلىكتى موينىمىزعا الىپ، اتا-بابادان جالعاسىپ، ۇزىلمەي كەلە جاتقان ۇلتتىق سالت-داستۇرلەرىمىزدى جوعالتپاي، بەرىك ۇستانۋدى العا قويىپ وتىرمىز. وسى تۇرعىدا ۇرپاقتىڭ رۋحاني تاربيەسىمەن اينالىساتىن ۇلتتىق ەتنولاگەرىمىزدى اشتىق. سەبەبى، مەملەكەت ۇلتتى قالىپتاستىرمايدى، ۇلت مەملەكەتتى قالىپتاستىرادى. جوعالتقانىمىزدى تۇگەندەپ، جانشىلعان ۇلتتىق رۋحىمىزدى ءتىرىلتىپ، وتكەنىمىز بەن وشكەنىمىزدى قايتا جاعىپ، قازاقتىڭ وزىنە ءتان ۇلتتىق بولمىسىن قايتارۋ – بۇگىنگى كۇننىڭ ەڭ وزەكتى ماسەلەسى بولىپ قالماق»، - دەپ پىكىرىن ءبىلدىردى «سارىجايلاۋ» ەتنولاگەرىنىڭ نەگىزىن قالاۋشىلاردىڭ ءبىرى –نۇر-سۇلتان قالاسى قحا انالار كەڭەسىنىڭ ءتورايىمى، PhD پسيحولوگيا دوكتورى التىناي تاڭىربەرگەنوۆا.
«ادىرنا» ۇلتتىق پورتالى
