شىمكەنتتە وقۋشىلار اراسىندا وتكەن SHYMKENT JASTAR LIGASY مارەسىنە جەتتى، دەپ حابارلايدى "ادىرنا" ۇلتتىق پورتالى.
بۇل تۋرالى فەيسبۋك پاراقشاسىندا قالا اكىمىنىڭ ءبىرىنشى ورىنباسارى شىڭعىس مۇقان جازدى.
ونىڭ ايتۋىنشا، SHYMKENT JASTAR LIGASY قالا اكىمى مۇرات ايتەنوۆتىڭ باستاماسىمەن وسىمەن ەكىنشى جىل قاتارىنان سپورتتىڭ ءتورت تۇرىنەن - شاحمات، ۆولەيبول، باسكەتبول، فۋتبولدان ءوتىپ جاتىر.
وقۋشىلار جىل بويى مەكتەپ ارالىق ويىندارعا قاتىسىپ، توپتىق كەزەڭگە جولداما الادى. مامىر ايىندا فينالدىق ويىندار وتەدى. وتكەن جىلى قازان ايىندا باستالعان SHYMKENT JASTAR LIGASY حالىقارالىق بالالار كۇنىندە ءوز مارەسىنە جەتتى.
قاجىمۇقان مۇڭايتپاسۇلى اتىنداعى ورتالىق ستاديوندا فۋتبولدان فينالدىق كەزدەسۋ ءوتتى. اباي اتىنداعى دارىندى بالالارعا ارنالعان №90 مامانداندىرىلعان مەكتەپ-ليتسەيى مەن ىبىراي التىنسارين اتىنداعى №65 مەكتەپ-گيمانزياسىنىڭ وقۋشىلارىنان قۇرالعان كوماندالار كەزدەستى. تارتىستى وتكەن ويىندا 3-1 ەسەبىمەن №65 مەكتەپتىڭ وقۋشىلارى جەڭىسكە جەتىپ، شىمكەنت جاستار ليگاسىنىڭ چەمپيونى اتاندى.
ويىننان كەيىن شىمكەنت جاستار ليگاسىنىڭ سالتاناتتى جابىلۋ ءراسىمى ءوتتى. وندا شىمكەنت قالاسىنىڭ اكىمى مۇرات ايتەنوۆ ءسوز سويلەپ، جارىستىڭ جەڭىمپازدارى مەن جۇلدەگەرلەرىن قۇتتىقتادى.
جارىستىڭ جالپى جۇلدە قورى 80 ميلليون تەڭگەنى قۇرادى. سپورتتىڭ ءار ءتۇرى بويىنشا جەڭىمپاز اتانعان مەكتەپكە 20 ميلليون تەڭگەدەن اقشالاي سىيلىق تابىس ەتىلدى. بۇل قارجى مەكتەپتەردىڭ ماتەريالدىق-تەحنيكالىق بازاسىن نىعايتۋعا جۇمسالادى.
سونىمەن «شىمكەنت جاستار ليگاسىندا» شاحمات بويىنشا ءو.جولداسبەكوۆ اتىنداعى №9 ءىت ليتسەيدىڭ كومانداسى يەلەندى. ۆولەيبول بويىنشا ءبىرىنشى ورىندى ءال-فارابي اتىنداعى №113 جالپى مەكتەپتىڭ كومانداسى جەڭىپ الدى. باسكەتبول بويىنشا م.ح.دۋلاتي اتىنداعى مەكتەپ-گيمانزياسىنىڭ كومانداسى جارىستىڭ جەڭىمپازى اتاندى.
ايتا كەتەيىك، جارىسقا شىمكەنتتەگى 151 ورتا مەكتەپتەن 6 مىڭعا جۋىق وقۋشى قاتىستى. جابىلۋ ءراسىمىنىڭ سوڭى وتاندىق ەسترادا جۇلدىزدارىنىڭ قاتىسۋمەن وتكەن كونتسەرتكە ۇلاستى.
"ادىرنا" ۇلتتىق پورتالى
