ۇلتتىق قاۋىپسىزدىك كوميتەتى قازاقستان ازاماتىنىڭ ۋكرايناداعى قارۋلى قاقتىعىسقا قاتىسقانى ءۇشىن قىلمىستىق ءىس قوزعادى، دەپ حابارلايدى «ادىرنا» ۇلتتىق پورتالى «ينتەرفاكس» اگەنتتىگىنە سىلتەمە جاساپ.
«قازىرگى ۋاقىتتا ۇقك نۇر-سۇلتان قالاسى بويىنشا دەپارتامەنتى قازاقستان ازاماتىنا قاتىستى ونىڭ ۋكراينا اۋماعىنداعى اسكەري قاقتىعىسقا نەمەسە اسكەري ءىس-قيمىلدارعا قاتىسقانى تۋرالى اقپارات تۇسۋىنە بايلانىستى قر قىلمىستىق كودەكسىنىڭ 172-بابى «شەتەلدىك قارۋلى قاقتىعىستارعا قاتىسۋ» بويىنشا قىلمىستىق ءىستى تەرگەپ جاتىر»، - دەدى قر ۇقك ءباسپاسوز قىزمەتىندەگىلەر.
ۇقك سونداي-اق، سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايتىنىن اتاپ ءوتتى.
«قازاقستان ازاماتتارىنىڭ قانداي دا ءبىر شەت مەملەكەتتەردىڭ اۋماعىنداعى قارۋلى قاقتىعىستارعا نەمەسە ۇرىس قيمىلدارىنا قاساقانا زاڭسىز قاتىسۋىنا بايلانىستى ارەكەتتەرى، جالدامالىلىق بەلگىلەرى بولماسا، قر قىلمىستىق كودەكسىنىڭ 172-بابى بويىنشا قاراستىرىلادى. مۇنداي قىلمىستى جاساعانى ءۇشىن بەس جىلدان توعىز جىلعا دەيىنگى مەرزىمگە باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك قاراستىرىلعان»، - دەدى ۇقك.
«ادىرنا» ۇلتتىق پورتالى.
