ۋكرايناداعى سوعىستان افريكا ەلدەرى قاتتى زارداپ شەكتى. قۇرلىققا يمپورتتالاتىن بيدايدىڭ شامامەن 40%-ءى رەسەي مەن ۋكراينادان تاسىمالدانادى. قالىپتاسقان جاعدايعا بايلانىستى افريكا وداعىنا توراعالىق ەتەتىن سەنەگال پرەزيدەنتى رەسەيگە كەلىپ، ۆلاديمير پۋتينمەن استىق پەن تىڭايتقىش جەتكىزۋ بويىنشا كەلىسسوزدەر جۇرگىزدى.دەپ حابارلايدى "ادىرنا" ۇلتتىق پورتالى "24.kz"-كە سىلتەمە جاساپ.
- افريكا گۋمانيتارلىق كومەك سۇراپ وتىرعان جوق. بىزگە ساۋدا-ساتتىق كەرەك. ءبىز بيدايدى ساتىپ الۋعا قاۋقارلىمىز. بىراق بۇل باعىتتا كەدەرگىلەر بولماۋى ءتيىس، — دەيدى سەنەگال پرەزيدەنتى، افريكا وداعىنىڭ توراعاسى ماكي سالل.
ۆلاديمير پۋتين استىق تيەلگەن كەمەلەردىڭ افريكاعا ەش كەدەرگىسىز جىبەرىلەتىنىن ايتتى. الايدا كرەمل باسشىسى ول ءۇشىن ۋكراينا ءوز كەمەجايلارىن مينادان تازارتۋى كەرەك دەيدى. ايتۋىنشا، الەمدىك نارىقتاعى قيىندىقتار پاندەميا كەزىندە باستالعان. ياعني بۇل بۇرىننان بار ماسەلە ەكەنىن ەسكە سالدى.
- ۋكراينادان وزگە ەلدەرگە استىق الىپ شىعارۋعا ءبىز كەدەرگى كەلتىرىپ جاتقان جوقپىز. ونى تاسىمالداۋدىڭ بىرنەشە جولى بار. ماسەلەن، ودەسسا سەكىلدى ۋكراينا قارۋلى كۇشتەرىنىڭ باقىلاۋىنداعى كەمەجايلار ارقىلى نەگە شىعارماسقا؟ وندا بارار جولدارعا جارىلعىش زاتتار قويىپ تاستاعان ءبىز ەمەس قوي. سوندىقتان تاعى دا ايتامىن - مينالار زالالسىزداندىرىلسىن. ال ءبىز ءوز تارابىمىزدان كەمەلەردىڭ حالىقارالىق سۋدا قاۋىپسىز قاتىناۋىن قامتاماسىز ەتەمىز، — دەدى رەسەي پرەزيدەنتى ۆلاديمير پۋتين.
ۋكراينا جاعى ودەسسا كەمەجايىنان ەكسپورتتىڭ قايتا جاندانۋىنا قاجەتتى جاعداي جاساۋعا دايىن ەكەندەرىن ايتادى. العاشقى قادام رەتىندە كيەۆ ماسكەۋدەن تاقاۋ ماڭداعى اسكەرىن اكەتۋىن جانە شابۋىل جاساماۋعا كەپىلدىك بەرۋىن تالاپ ەتىپ وتىر.
- رەسەي وكىلدەرى ۋكراينانى ايىپتاپ وتىر. ولار افريكاداعى اشتىقتى ۋكرايناداعى قارۋلى قاقتىعىستىڭ باستالۋىمەن ەمەس، باتىس ەلدەرىنىڭ سانكتسيالارىمەن بايلانىستىرىپ وتىر، — دەيدى ۋكراينانىڭ بۇۇ جانىنداعى تۇراقتى وكىلى ەۆگەنيا فيليپەنكو.
بۇۇ مالىمەتىنە سايكەس، استىق قۇنىنىڭ مامىرداعى يندەكسى كەيىنگى 14 جىلدا بولماعان كورسەتكىشتەرگە جەتكەن. بيداي وسىمەن ءتورت اي بويى قىمباتتاپ كەلەدى. ساراپشىلاردىڭ ايتۋىنشا، سوعىس جالعاسىپ، ۋكراينا مەن رەسەيدەن بيداي، جۇگەرى مەن سۇيىق مايدىڭ ەكسپورتى قىسقارسا، جىل سوڭىنا دەيىن الەمدە 18 ملن ادام اشتىق زاردابىن تارتۋى مۇمكىن.
"ادىرنا" ۇلتتىق پورتالى
