ەكىباستۇزداعى №24 مەكتەپ-گيمنازياسىندا دانەكەرلەۋ جۇمىستارىن جۇرگىزۋ كەزىندە ءورت قاۋىپسىزدىگى ەرەجەلەرىن بۇزۋ سالدارىنان قۇرىلىس ماتەريالدارى مەن پلاستيكالىق كونسترۋكتسيالار ورتەندى. بۇل تۋرالى پاۆلودار وبلىسىنىڭ دەنساۋلىق ساقتاۋ باسقارماسى مالىمدەدى، دەپ حابارلايدى “ادىرنا” ۇلتتىق پورتالى.
ءورت جوندەۋ جۇمىستارى كەزىندە ءبىرىنشى قاباتتاعى كابينەتتە ساعات 10-دا باستالدى. 40 شارشى مەتر اۋماقتا قۇرىلىس زاتتارى مەن پلاستيك قۇرىلىمدار جانىپ كەتكەن. ءورت ساعات 10:15-تە وقشاۋلاندى.
ءورت سوندىرۋشىلەر كەلگەنگە دەيىن وقيعا ورنىنان پروپان قۇيىلعان باللون مەن 40 جۇمىسشى ەۆاكۋاتسيالاندى.
"قۇرىلىستىڭ تۇرىنە قاراي جوندەۋ جۇمىستارىن بىرنەشە مەردىگەر اتقارادى. ءورت جىلۋ جۇيەسىن جوندەۋ كەزىندە دانەكەرلەۋ جۇمىسىن جۇرگىزگەن "بەكتەمىر قۇرىلىس" جشس كىناسىنەن شىققان. فيرما باسشىلىعى ءوز قاتەلىگىن مويىنداپ، شىعىندى وتەۋگە دايىن ەكەنىن جەتكىزدى", - دەدى مەكتەپ ديرەكتورى قۇرالاي راحمەتجانوۆا.
ونىڭ ايتۋىنشا، بۇگىندە كۇردەلى جوندەۋدىڭ جالپى كولەمىنىڭ 60 پايىزى ورىندالعان. جاڭا وقۋ جىلى باستالعانعا دەيىن مەكتەپتە جىلۋ جۇيەسىن جوندەۋ جانە ەلەكتر سىمدارىن اۋىستىرۋ، جاڭا ەسىكتەر مەن تەرەزەلەر ورناتۋ، عيماراتتىڭ قاسبەتى مەن ىشكى ارلەۋىن جاڭارتۋ جوسپارلانۋدا.
ء"ورت سالدارىنان جوندەلگەن ەكى كابينەت زارداپ شەكتى، سونداي-اق تاعى ءبىر مەردىگەر – "قازەۆروستروي" جشس-ءنىڭ قۇرىلىس ماتەريالدارى جارامسىز بولىپ قالدى. شىعىن سوماسى انىقتالعان سوڭ كىنالى تۇلعالار شىعىندى وتەيدى. جوندەۋ جۇمىستارىن جالعاستىرىپ، مەرزىمىندە اياقتايمىز دەپ ۇمىتتەنەمىز", - دەدى ءبىلىم بەرۋ ءبولىمى باسشىسىنىڭ مىندەتىن اتقارۋشى دينارا احمەتوۆا.
”ادىرنا” ۇلتتىق پورتالى
