پرەزيدەنت اكىمشىلىگىنىڭ باسشىسى مۇرات نۇرتىلەۋ بۇگىنگى جۇمىس ساپارى اياسىندا سەمەي قالاسىنا بارىپ، ءوڭىردىڭ بارلىق دەڭگەيدەگى ءماسليحاتتارىنىڭ جيىنىنا قاتىستى، دەپ حابارلايدى "ادىرنا" ۇلتتىق پورتالى "akorda.kz"-كە سىلتەمە جاساپ.
مۇرات نۇرتىلەۋ اباي وبلىسىنىڭ اكىمى لاۋازىمىنا ۇرانحاەۆ نۇرلان تەلمانۇلى مەن سمايىلوۆ اسحات سايداحمەتۇلىنىڭ كانديداتۋرالارىن ۇسىنۋ تۋرالى مەملەكەت باسشىسىنىڭ حاتىن وقىپ بەردى.
اشىق داۋىس بەرۋ ناتيجەسىندە 25 دەپۋتات اسحات سمايىلوۆقا، 89 دەپۋتات نۇرلان ۇرانحاەۆقا داۋىس بەردى.
پرەزيدەنت اكىمشىلىگىنىڭ باسشىسى جاڭادان قۇرىلعان وبلىستىڭ اكىمىن تانىستىرا كەلە، نۇرلان ۇرانحاەۆتىڭ سەمەي قالاسىندا دۇنيەگە كەلگەنىن جانە ونىڭ جاۋاپتى باسقارۋشىلىق قىزمەتتەردە تاجىريبەسى مول ەكەنىن اتاپ ءوتتى.
مۇرات نۇرتىلەۋ وبلىسقا قازاقتىڭ ۇلى اقىنى اباي ەسىمىنىڭ بەرىلۋى حالىقتىڭ رۋحىن كوتەرەتىن تاريحي ءارى ءادىل شەشىم بولعانىن ايتتى.
كەزدەسۋ سوڭىندا مۇرات نۇرتىلەۋ نۇرلان ۇرانحاەۆقا وبلىس تۇرعىندارىنىڭ يگىلىگى ءۇشىن پرەزيدەنت جۇكتەگەن مىندەتتەردى ابىرويمەن اتقارۋدى تىلەدى.
"ادىرنا" ۇلتتىق پورتالى
