اقش ۋكرايناعا قاۋىپسىزدىك سالاسىنا جاردەم اياسىندا تاعى ءبىر ميلليارد دوللاردىڭ قارۋ-جاراعىن بەرمەك، دەپ حابارلايدى «ادىرنا» ۇلتتىق پورتالى.
بۇل تۋرالى اقش پرەزيدەنتى دجو بايدەن 15 ماۋسىمدا ۋكراينا پرەزيدەنتى ۆلاديمير زەلەنسكيمەن تەلەفونمەن سويلەسكەن كەزدە ايتتى دەپ حابارلادى اق ءۇيدىڭ ءباسپاسوز قىزمەتى.
ەكى ەل باسشىلارى رەسەيدىڭ ۋكرايناعا باسقىنشىلىق جاساپ، سول ەلدىڭ اۋماعىندا ءتورت ايعا جۋىق ۋاقىت بويى جۇرگىزىپ جاتقان سوعىستى تالقىلاعان. ۋكراينا پرەزيدەنتى ەلىنە قولداۋ بىلدىرگەن اقش-قا العىس ايتقان.
ۆاشينگتون ۋكرايناعا كومەك رەتىندە ارتيللەريالىق جانە تەڭىز جاعالاۋى قورعانىسى قارۋ-جاراعى مەن وق-دارىلەر، قازىرگى زامانعى زىمىران جۇيەلەرىن بەرمەك. قازىر دونباسستا قورعانىس وپەراتسياسىن جۇرگىزىپ جاتقان ۋكراين كۇشتەرى مۇنداي قارۋ-جاراققا مۇقتاج ەكەنىن كيەۆ بۇرىننان ايتىپ كەلەدى.
بۇعان قوسا بايدان اقش-تىڭ ۋكراينا حالقىنا گۋمانيتارلىق كومەككە دەپ قوسىمشا قارجى بولەتىنىن حابارلاعان.
ء"بىز وسى سوعىستىڭ كەسىرىنەن تاعدىرى تالكەككە تۇسكەن ۋكراينالىقتاردى قولداۋدان اينىمايمىز. بۇگىن مەن ۋكراينا حالقىنا گۋمانيتارلىق كومەككە قوسىمشا 225 ميلليون دوللار بەرىلەىنىن جاريالايمىن، بۇل قارجى قاۋىپسىز اۋىز سۋ، قاجەتتى ءدارى-دارمەك پەن مەديتسينا جابدىقتارىن، ازىق-تۇلىك پەن وتباسىلارعا كۇندەلىكتى قاجەت زاتتاردى ساتىپ الۋ ءۇشىن اقشالاي بەرىلەدى" دەپ مالىمدەگەن اقش پرەزيدەنتى.
بايدەن اقش رەسەيدىڭ ەش سەبەپسىز سوعىس اشقانىن ايىپتاپ، ۋكراينانى قولدايدى جانە ونىڭ ەگەمەندىگى مەن دەموكراتياسىن، جەرىنىڭ تۇتاستىعىن قورعاۋىنا جاردەمدەسەدى دەگەن.
"ۋكراينا حالقىنىڭ ەرجۇرەكتىگى، تاباندىلىعى مەن باتىلدىعى بۇكىل الەمدى ءتانتتى ەتتى. اقش وداقتاستارى جانە سەرىكتەستەرىمەن بىرگە ۋكراين حالقىنىڭ ازاتتىق جولىنداعى كۇرەسىنە قولداۋ كورسەتۋدى بوساڭسىتپايدى" دەلىنگەن اق ءۇي مالىمدەمەسىندە.
بايدەن قازىر بريۋسسەلدە جۇرگەن اقش قورعانىس ءمينيسترى للويد ءوستيننىڭ ۋكراينا قارۋلى كۇشتەرىنە حالىقارالىق قوسىمشا كومەكتى ۇيلەستىرۋگە كۇش سالىپ جاتقانىن دا ايتقان.
«ادىرنا» ۇلتتىق پورتالى.
