قازاقستان مەن يران پرەزيدەنتتەرى شاعىن قۇرامدا كەلىسسوز جۇرگىزدى، دەپ حابارلايدى «ادىرنا» ءتىلشىسى.
«بۇگىنگى كەلىسسوزدەرىمىز ەكى ەلدىڭ ىنتىماقتاستىعىن دامىتۋعا تىڭ سەرپىن بەرەدى دەپ سەنەمىن. قازاقتا «كورشى اقىسى – ءتاڭىر حاقىسى» دەگەن ءسوز بار. ءبىز – كورشىمەن ارقاشان تاتۋ بولعان ەلمىز. يران – كاسپي جاعاسىنداعى جاقىن كورشىمىز، سەنىمدى سەرىكتەسىمىز»،– دەدى قاسىم-جومارت توقاەۆ.
مەملەكەت باسشىسى ەلدەرىمىز اراسىندا ديپلوماتيالىق قاتىناس ورناعانىنا بيىل 30 جىل تولعانىن اتاپ ءوتتى. ايتۋىنشا، وسى كەزەڭ ىشىندە ىنتىماعىمىز ارتىپ، دوستىعىمىز نىعايا ءتۇستى.
– جان-جاقتى بايلانىسىمىز قارقىندى دامىپ كەلە جاتىر. بۇعان ءوزارا سەنىمگە نەگىزدەلگەن ساياسي ديالوگتىڭ ارقاسىندا قول جەتكىزىپ وتىرمىز. ءبىزدىڭ ۇكىمەتارالىق، پارلامەنتارالىق جانە ىسكەرلىك كەڭەستەرىمىز بار. ساۋدا-ەكونوميكالىق ىنتىماقتاستىعىمىز كەدەرگىلەرگە قاراماستان، جىلدان-جىلعا ارتىپ كەلەدى. بيىلعى ءبىرىنشى توقساندا ساۋدا-ساتتىق 50 پايىزعا ارتتى. ەندىگى ماقسات – وسى قارقىندى توقتاتپاي، بارىنشا كوبەيتۋ. وعان ءبىزدىڭ الەۋەتىمىز جەتەدى. مەن ءسىزدىڭ ءوزارا سەرىكتەستىكتى دامىتۋعا قوسقان ۇلەسىڭىزدى جوعارى باعالايمىن. قارىم-قاتىناسىمىزدى دامىتۋعا بار كۇش-جىگەرىمدى جۇمساۋعا ءازىرمىن، – دەدى مەملەكەت باسشىسى.
قاسىم-جومارت توقاەۆ وسى ساپارىنىڭ اياسىندا ماڭىزدى شەشىمىن جاريالاۋعا ۇيعارىم جاساعانىن ايتتى.
– ءبىز يران ازاماتتارىنىڭ قازاقستاندا 14 كۇن ۆيزاسىز ءجۇرىپ-تۇرۋىنا رۇقسات بەرەمىز. بۇل ءتۇرلى سالاداعى ىنتىماقتاستىقتى نىعايتۋعا سەپتىگىن تيگىزەدى. سونداي-اق، ىسكەر توپ وكىلدەرىنىڭ بايلانىسىن جانداندىرادى. بارىس-كەلىسكە تىڭ سەرپىن بەرىپ، تۋريستەردىڭ كوپتەپ كەلۋىنە ىقپال ەتەدى. يران كاسىپكەرلەرى وسى جەڭىلدىكتى كەڭىنەن قولدانادى دەپ سەنەمىن، – دەدى قازاقستان پرەزيدەنتى.
يران يسلام رەسپۋبليكاسىنىڭ پرەزيدەنتى يبراحيم رايسي قاسىم-جومارت توقاەۆقا ءىلتيپات كورسەتىپ، شاقىرۋىن قابىل العانى ءۇشىن العىس ايتتى.
– ءبىز العاش رەت دۋشانبە سامميتىندە كەزدەسكەن ەدىك. سىزبەن ەكىنشى رەت تەگەراندا جۇزدەسىپ وتىرعانىما قۋانىشتىمىن. ءسىزدىڭ پرەزيدەنت رەتىندە كەلگەن بۇل ساپارىڭىز ەكىجاقتى قارىم-قاتىناستارىمىزدىڭ دامۋىنا تىڭ سەرپىن بەرەتىن ۇلى بەتبۇرىس بولارىنا سەنىمدىمىن، – دەدى ول.