Qazaqstan men İran prezidentterı şaǧyn qūramda kelıssöz jürgızdı, dep habarlaidy «Adyrna» tılşısı.
«Bügıngı kelıssözderımız ekı eldıŋ yntymaqtastyǧyn damytuǧa tyŋ serpın beredı dep senemın. Qazaqta «Körşı aqysy – täŋır haqysy» degen söz bar. Bız – körşımen ärqaşan tatu bolǧan elmız. İran – Kaspii jaǧasyndaǧy jaqyn körşımız, senımdı serıktesımız»,– dedı Qasym-Jomart Toqaev.Memleket basşysy elderımız arasynda diplomatiialyq qatynas ornaǧanyna biyl 30 jyl tolǧanyn atap öttı. Aituynşa, osy kezeŋ ışınde yntymaǧymyz artyp, dostyǧymyz nyǧaia tüstı.
– Jan-jaqty bailanysymyz qarqyndy damyp kele jatyr. Būǧan özara senımge negızdelgen saiasi dialogtyŋ arqasynda qol jetkızıp otyrmyz. Bızdıŋ ükımetaralyq, parlamentaralyq jäne ıskerlık keŋesterımız bar. Sauda-ekonomikalyq yntymaqtastyǧymyz kedergılerge qaramastan, jyldan-jylǧa artyp keledı. Biylǧy bırınşı toqsanda sauda-sattyq 50 paiyzǧa artty. Endıgı maqsat – osy qarqyndy toqtatpai, barynşa köbeitu. Oǧan bızdıŋ äleuetımız jetedı. Men sızdıŋ özara serıktestıktı damytuǧa qosqan ülesıŋızdı joǧary baǧalaimyn. Qarym-qatynasymyzdy damytuǧa bar küş-jıgerımdı jūmsauǧa äzırmın, – dedı Memleket basşysy.Qasym-Jomart Toqaev osy saparynyŋ aiasynda maŋyzdy şeşımın jariialauǧa ūiǧarym jasaǧanyn aitty.
– Bız İran azamattarynyŋ Qazaqstanda 14 kün vizasyz jürıp-tūruyna rūqsat beremız. Būl türlı saladaǧy yntymaqtastyqty nyǧaituǧa septıgın tigızedı. Sondai-aq, ısker top ökılderınıŋ bailanysyn jandandyrady. Barys-kelıske tyŋ serpın berıp, turisterdıŋ köptep keluıne yqpal etedı. İran käsıpkerlerı osy jeŋıldıktı keŋınen qoldanady dep senemın, – dedı Qazaqstan Prezidentı.İran İslam Respublikasynyŋ Prezidentı İbrahim Raisi Qasym-Jomart Toqaevqa ıltipat körsetıp, şaqyruyn qabyl alǧany üşın alǧys aitty.
– Bız alǧaş ret Duşanbe sammitınde kezdesken edık. Sızben ekınşı ret Tegeranda jüzdesıp otyrǧanyma quanyştymyn. Sızdıŋ Prezident retınde kelgen būl saparyŋyz ekıjaqty qarym-qatynastarymyzdyŋ damuyna tyŋ serpın beretın ūly betbūrys bolaryna senımdımın, – dedı ol.
