قىرعىزستاننىڭ بۇرىنعى پرەزيدەنتى اسقار اقاەۆ 2005 جىلى بيلىكتەن كەتۋگە ءماجبۇر بولعانىن بيلىكتى سىنايتىن تاۋەلسىز گازەتتەردىڭ پايدا بولعانىمەن بايلانىستىردى، دەپ حابارلايدى "ادىرنا" ازاتتىققا سىلتەپ.
ونىڭ سوزىنشە، قىرعىزستانداعى ءسوز ەركىندىگى، ءتىپتى قازاقستان مەن وزبەكستان پرەزيدەنتتەرىنىڭ دە قىتىعىنا تيگەن.
نەمىستىڭ DW باسىلىمىنا بەرگەن سۇقباتىندا اقاەۆ "الدەبىر سىرتقى كۇشتەر گرۋزياداعى "قىزعالداقتار رەۆوليۋتسياسى" مەن ۋكرايناداعى "سارعىلت رەۆوليۋتسيادان" كەيىن وزبەكستاندا توڭكەرىس ۇيىمداستىرماق بولعانىن، الايدا وزبەكستاننان ەشتەڭە شىعارا الماعان سوڭ قىرعىزستانعا كوز تىككەنىن" ايتادى.
"قىرعىزستان ەڭ ءالسىز ەل بوپ شىقتى، ويتكەنى بىزدە ەركىن ءباسپاسوز بار ەدى. Freedom House ۇيىمىنا باق-قا ارنالعان تيپوگرافيا اشۋعا رۇقسات بەرىپ، ەڭ ۇلكەن قاتەلىك جاسادىم. ولارعا بارىنشا ەركىندىك بەردىم، سونىڭ ارقاسىندا بۇكىل تاۋەلسىز گازەتتەردى باسىپ شىعارا باستادى. ءبىز تۋرالى، مەنىڭ وتباسىم جايلى قيسىنعا كەلمەيتىن نەبىر وتىرىكتەر جازاتىن گازەتتەردى ميلليونداعان تيراجبەن تەگىن شىعاردى", - دەپ ەسكە الادى بۇرىنعى پرەزيدەنت.
ونىڭ سوزىنشە، بۇل تيپوگرافيانىڭ جۇمىسى كورشى ەلدەردىڭ پرەزيدەنتتەرىنىڭ دە قىتىعىنا تيگەن، مىسالى قازاقستان مەن وزبەكستاندا تىيىم سالىنعان وپپوزيتسيالىق باسىلىمدار قىرعىزستاندا باسىلىپ، اتالعان ەلدەرگە تاراعان.
"بىردە نۇرسۇلتان ءابىشۇلى [نازارباەۆ] تەلەفون سوعىپ: ء"اي، دەموكرات، دەموكراتياڭدى ۇيىڭدە جاساي بەر، بىزدە نەڭ بار؟ سەنىڭ تيپوگرافيالارىڭدا شىققان گازەتتەر مەنى سىناپ جاتىر!" دەدى. يسلام ابدۋعانيۇلى دا [كارىموۆ] ءسويتىپ ايتتى. مىنە، مەنىڭ قاتەلىگىم وسى بولدى، ايتپەسە ەكونوميكامىزدىڭ تاسى ورگە دومالاپ تۇرعان بولاتىن", - دەيدى اقاەۆ.
اقاەۆ 1991-2005 جىلدار ارالىعىندا قىرعىزستان پرەزيدەنتى بولعان. 2005 جىلى 24 ناۋرىزدا "قىزعالداق رەۆوليۋتسياسى" كەزىندە وتستاۆكاعا كەتىپ، ماسكەۋدەن ساياسي باسپانا العان.
