قادىر تۇنىندە مەشىتتەن ۇيىنە قايتىپ كەلە جاتىپ، تاكسيدە جۇمباق جاعدايدا قايتىس بولعان 18 جاسار جىگىتتىڭ اتا-انا ءىستىڭ ءمان-جايى تولىق قاراستىرىلماعىن ايتتى، دەپ حابارلايدى "ادىرنا" ۇلتتىق پورتالى Almaty ارناسىنا سىلتەمە جاساپ.
18-گە تولعانىنا 2 اپتا بولعان راسۋل مەشىتتەن ۇيىنە قايتپاق نيەتپەن تاكسي شاقىرادى. ءتۇن جارىمىندا بەيتانىس ەكى جىگىتپەن ءبىر كولىكتە كەتىپ بارا جاتىپ، ول الەۋمەتتىك جەلىدە تىكەلەي ەفيرگە شىعىپ تا ۇلگەرگەن. قازىر قولدا بار ساناۋلى دەرەكتىڭ ءبىرى - وسى. بەينەدە راسۋل وتىرعان كولىكتىڭ جول ورتاسىمەن كەتىپ بارا جاتقانىن انىق بايقاۋعا بولادى. ال جيەكتە توقتاپ تۇرعان جۇك كولىگىنە بارىپ سوعىلعاندارىن رولدە بولعان جىگىت تە، ونىڭ دوسى دا «ۇيىقتاپ كەتىپپىز» دەپ تۇسىندىرگەن.
«ەكى انا، شوفەرمەن جولداس، امان. قولىندا داق تا جوق. ال مەنىڭ ۇلىم كولىكتىڭ ارتىندا، قاۋىپسىز جەردە وتىرعان. بەتى دە، باسى دا جارالىنىپ، دەنەسىنىڭ ءبارى كوگەرگەن»، – دەدى ر. تۇرسىنباەۆتىڭ اكەسى مۇرات تۇرسىنباەۆ
اپات تىركەلگەن ۋاقىتتان 1 ساعات وتكەندە راسۋل قايتىس بولادى. سوت-مەديتسينالىق ساراپتاماعا سۇيەنسەك، جىگىتتىڭ ميىنا قان قۇيىلعان. بىراق ەسكەرەر تاعى ءبىر جايت، ادۆوكاتتىڭ ايتۋىنشا، ازاماتتىڭ دەنەسىنىڭ كەي تۇسى كوگەرگەن. ال جوعارىدا ايتقان راسۋلدىڭ سوڭعى تىكەلەي ەفيرىندە ونىڭ ەكى جۇرگىزۋشىمەن سوزگە كەلىپ قالعانى دا تاسپالانعان. سوندىقتان، اتا - اناسى اپات الدىندا بالالاردىڭ ءوزارا توبەلەسۋى دە مۇمكىن دەپ وتىر. بۇل ازىرگە تەك بولجام عانا.
«اكە-شەشەسى كەلىپ، كەشىرىم سۇرادى. «بالامدى كەشىرىڭىزشى، كومەكتەسەيىن» دەدى. مەن كەرەك ەمەس دەدىم. بالامدى سوڭعى ساپارعا ءوزىم اتتاندىرام»، – دەدى ر. تۇرسىنباەۆتىڭ اكەسى مۇرات تۇرسىنباەۆ.
ال قورعاۋشى ءىس ءالى دە ءجۇرىپ جاتقانىن، بىراق كوپ دەرەك نازاردان تىس قالعانىن ايتتى.
«اتالعان ىسپەن تانىستىم. ادۆوكات رەتىندە بۇل ءىس اۋىر قىلمىسقا جاتادى. ويتكەنى قايتىس بولعان بالانىڭ دەنەسىندە كوگەرگەن جەرلەرى بار. ءبىز قازىر تولىق ساراپتامالاردى جۇرگىزۋىن تالاپ ەتەمىز»، – دەدى قورعاۋشى ايدا دانابەكوۆا.
زاڭگەر ءتيىستى بەينەتىركەۋدى دە الا الماي وتىرعانىن ايتادى. قۇزىرلى ورگانداردىڭ بۇعان دەيىن بەرگەن تۇسىنىكتەرىنە سۇيەنسەك، اۆتوكولىك شەتەلدىك نومەرمەن تىركەلگەن، سوندىقتان ونى «سەرگەك» بەينەكامەراسى ارقىلى باقىلاۋ مۇمكىن ەمەس.
«قىلمىستىق كودەكستىڭ 345-بابىنىڭ 3-تارماعى بويىنشا تىركەلىپ، قازىرگى تاڭدا انىقتاۋ باسقارماسىنىڭ قىزمەتكەرلەرى قىلمىستىق ءىس اياسىندا بىرقاتار ساراپتامالىق زەرتتەۋلەر تاعايىندادى. وسى ساراپتامالىق زەرتتەۋلەردىڭ ناتيجەسى وندىرىسكە كەلگەننەن كەيىن قىلمىستىق ءىس جۇرگىزۋ كودەكسىنىڭ 190-بابىنا سايكەس، ءىس ماتەريالدارى سوتقا جونەلتىلەتىن بولادى»، – دەدى الماتى قالاسى پد رەسمي وكىلى سالتانات ازىربەك.
ءىستىڭ ارا-جىگى اجىراتىلمادى دەۋگە ءالى ەرتە. ويتكەنى بۇعان دەيىن 2 سوت وتىرىسى وتكەن. الدا ءالى بىرنەشە تىڭدالىم بار.
"ادىرنا" ۇلتتىق پورتالى
