"جەكە كۇشتەر وزدەرىنىڭ پايداكۇنەمدىك ماقساتتارى ءۇشىن "كونستيتۋتسيالىق رەفورمامەن كەلىسپەيمىز" دەگەن جەلەۋمەن وزبەكستانداعى جاعدايدى شايقالتىپ، تۇراقسىزداندىرۋعا تىرىسۋدا". وزبەكستان پرەزيدەنتى شاۆكات ميرزيوەۆ قاراقالپاقستانداعى وقيعالارعا بايلانىستى جاساعان ۇندەۋىندە وسىلاي دەدى، دەپ جازادى "ادىرنا" ۇلتتىق پورتالى.
ونىڭ ايتۋىنشا، كونستيتۋتسيالىق رەفورما ەلدىڭ ودان ءارى قوعامدىق-ساياسي جانە الەۋمەتتىك-ەكونوميكالىق دامۋىن، ازاماتتاردىڭ قۇقىقتارى مەن بوستاندىقتارىن قامتاماسىز ەتۋدى كوزدەپ وتىر.
"دەموكراتيالىق قاعيداتتار مەن قۇقىقتىق نورمالار نەگىزىندە ازاماتتاردىڭ ەركىن تۇردە پىكىرىن ءبىلدىرۋى ءۇشىن جاسالعان جاعدايلارعا قاراماستان، جەكە كۇشتەر اگرەسسيا مەن زورلىق - زومبىلىق جولىن تاڭداپ، وزدەرىنىڭ پايداكۇنەمدىك ماقساتتارى ءۇشىن "كونستيتۋتسيالىق رەفورمامەن كەلىسپەيمىز" دەگەن جەلەۋمەن وزبەكستانداعى جاعدايدى شايقالتىپ، تۇراقسىزداندىرۋعا تىرىسۋدا".- دەيدى وزبەكستان باسشىسى.
ميرزيوەۆ دەسترۋكتيۆتى كۇشتەر جالعان اقپارات تاراتۋدىڭ دالەلدەنگەن تەحنولوگيالارىن، الەۋمەتتىك جەلىلەردىڭ مۇمكىندىكتەرىن پايدالانا وتىرىپ، ازاماتتاردى كونستيتۋتسياعا قارسى ارەكەتتەرگە ماقساتتى تۇردە تارتادى دەپ سانايدى.
"ولاردىڭ باستى ماقساتى – قوعامدى جىككە ءبولۋ، مەملەكەتتىڭ جۇرگىزىپ جاتقان سىندارلى ساياساتىنا دەگەن سەنىمدى ازايتۋ، وزبەكستاننىڭ اۋماقتىق تۇتاستىعىنا نۇقسان كەلتىرۋ. الايدا قاراقالپاقستاندا جۇزەگە اسىرىلىپ جاتقان وڭ وزگەرىستەر جەدەل قارقىنمەن جالعاساتىن بولادى", - دەيدى ميرزيوەۆ.
وزبەكستان پرەزيدەنتىنىڭ مالىمدەۋىنشە، سەپاراتيزمگە، جاپپاي تارتىپسىزدىكتەرگە، بيلىك ورگاندارىنا قارسى كۇش كورسەتۋگە شاقىرۋ ارەكەتى قولدانىستاعى زاڭناماعا سايكەس قاتاڭ تۇردە توقتاتىلىپ، كىنالىلەر جازاعا تارتىلادى.
"ادىرنا" ۇلتتىق پورتالى
