وزبەكستان پرەزيدەنتى شاۆكات ميرزيوەۆ 21 شىلدەدەن باستاپ قاراقالپاقستانداعى توتەنشە جاعداي رەجيمىن توقتاتۋ تۋرالى جارلىققا قول قويدى، دەپ جازادى "ادىرنا" ۇلتتىق پورتالى.
"وزبەكستان رەسپۋبليكاسى پرەزيدەنتىنىڭ 2022 جىلعى 2 شىلدەدەگى جارلىعىمەن ەنگىزىلگەن قاراقالپاقستان رەسپۋبليكاسىنىڭ اۋماعىندا توتەنشە جاعدايدىڭ قولدانىلۋى 2022 جىلعى 21 شىلدەدە 05 ساعات 00 مينۋتتان باستاپ مەرزىمىنەن بۇرىن توقتاتىلسىن", - دەلىنگەن پرەزيدەنتتىڭ ءباسپاسوز قىزمەتىنىڭ حابارلاماسىندا.
قۇجاتتا قاراقالپاقستان رەسپۋبليكاسى جوعارعى كەڭەسىنىڭ توتەنشە جاعدايدىڭ قولدانىسىن مەرزىمىنەن بۇرىن توقتاتۋ تۋرالى ءوتىنىشى بويىنشا جانە قاراقالپاقستان اۋماعىندا قوعامدىق ءتارتىپ قالپىنا كەلتىرىلىپ، ازاماتتاردىڭ قاۋىپسىزدىگى، ولاردىڭ قۇقىقتارى مەن بوستاندىقتارى قورعالعانىن ەسكەرە وتىرىپ شەشىم قابىلدانعانى ايتىلعان.
"ادىرنا" ۇلتتىق پورتالى
