اسكەردە قازا تاپقان ماڭعىستاۋلىق الىبەك قالبايعا قاتىستى تەرگەۋ اياقتالدى، دەپ جازادى "ادىرنا" ۇلتتىق پورتالى.
«استانا» تەلەارناسىنىڭ حابارلاۋىنشا، بۇل تۋرالى اسكەري پروكۋراتۋرانىڭ رەسمي وكىلى مالىمدەگەن. ونىمەن اسكەردە بورىشىن بىرگە وتەگەن سارباز كۇدىكتى رەتىندە قاماۋعا الىنعان. سوتقا دەيىنگى تەرگەۋ كەزىندە كۇدىكتىنىڭ كىناسىن دالەلدەيتىن ماتەريال تولىعىمەن جينالدى دەيدى.
«قاتارداعى جاۋىنگەر قالبايدىڭ قايتىس بولۋى بويىنشا قىلمىستىق ءىستىڭ اياقتالعانىن، ياعني مۇندا قازىرگى جاعدايدا تاراپتار ءىستىڭ قۇجاتتارىمەن تانىسۋدا. سودان كەيىن ءىستى سوتقا جىبەرەتىن بولامىز. كۇدىكتى رەتىندە ونىڭ اسكەردە بىرگە جۇرگەن امانجولوۆ ءوتىپ جاتىر. قازىر ول سوتتىڭ سانكتسياسىمەن قاماۋدا وتىر. جانە دە ءىستىڭ ماتەريالدارىمەن تانىسىپ وتىر»، – دەيدى باس اسكەري پروكۋروردىڭ اعا كومەكشىسى ەركىن قوجا-احمەت.
ەستەرىڭىزگە سالا كەتەيىك، بۇعان دەيىن جامبىل وبلىسىنداعى اسكەري بولىمدە قازا تاپقان ماڭعىستاۋلىق ساربازدىڭ تۋىستارى «قىلمىس تولىق اشىلمادى» دەپ نارازىلىق بىلدىرگەن بولاتىن. دەگەنمەن، اسكەري پروكۋراتۋرا الىبەك قالبايدىڭ ولىمىنەن سوڭ اسكەردەگى جاعدايدى ءجىتى نازارعا العانىن جەتكىزدى.
