12 ملن تەڭگە بيۋدجەت قاراجاتىن ۇرلاۋ فاكتىسى بويىنشا شقو جەتىم بالالارعا ارنالعان مەكتەپ-ينتەرناتىنىڭ ديرەكتورىنا قاتىستى قىلمىستىق ءىستىڭ تەرگەۋى اياقتالدى، دەپ حابارلايدى «ادىرنا» ءتىلشىسى.
«تەرگەۋ بارىسىندا ا.بازارحانوۆانىڭ 2013 – 2019 جىلدار ارالىعىندا ەمدىك دەنە شىنىقتىرۋعا بولىنگەن اقشا قاراجاتىن ۇرلاعانى، ياعني مەكتەپ ديرەكتورىنىڭ ساباق وتكىزبەستەن، وقۋ ساعاتتارىن جۇرگىزگەنى ءۇشىن اقى الىپ وتىرعانى انىقتالدى. ناتيجەسىندە بالالار بىلىكتى ەم الۋ قۇقىقتارىنان ايرىلعان.
بۇدان باسقا، باسشى ينتەرنات قىزمەتكەرلەرىنە قوسىمشا جۇمىس ىستەگەندەرى ءۇشىن اقى اۋدارىپ وتىرعان، كەيىننەن ولار ول اقشالاردى ەسەپ شوتتارىنان شەشىپ، بازارحانوۆاعا قايتارىپ بەرىپ وتىرعان. شىن مانىندە قىزمەتكەرلەر قوسىمشا جۇمىس اتقارماعان.
سونىمەن قاتار، ا.بازارحانوۆا ءوزىنىڭ تانىسىنا قارىزدى قايتارۋ ماقساتىندا ونىڭ جۇبايىن جۇمىسقا الدى. وسىلايشا، جالعان جۇمىسقا ورنالاسۋشىعا 729 مىڭ تەڭگە ەڭبەكاقى تولەپ، بيۋدجەت قاراجاتىن تالان تاراجعا سالعان»،— دەپ مالىمدەدى قارجىلىق مونوتورينگ اگەنتتىگى.
شىعىس قازاقستان وبلىستىق سوتىنىڭ قىلمىستىق ىستەر بويىنشا سوت القاسى ديرەكتوردىڭ ءوز كىناسىن مويىنداپ، شىعىندى تولىقتاي قايتارعانىن، ءجاسوسپىرىم بالاسىنىڭ بار ەكەنىن ەسكەرە وتىرىپ، وعان 4 جىل باس بوستاندىعىنان ايىرۋ جازاسىن تاعايىندادى.
