جاڭادان قۇرىلعان جەتىسۋ وبلىسىنىڭ ءوندىرىسى وركەندەپ، ەكونوميكالىق قۋاتى ارتپاق. الداعى تاڭدا وڭىردە فري كارتوبىن وندىرەتىن سۋ جاڭا كاسىپورىن اشىلۋى مۇمكىن. بۇل تۋرالى قر اۋىل شارۋاشىلىعى ءمينيسترىنىڭ ورىنباسارى ءابىلحايىر تامابەكتىڭ وڭىرگە ساپارى بارىسىندا تالقىلاندى.
الدىمەن ۆيتسە-مينيستر كارتوپ وسىرۋگە ماماندانعان ءىرى شارۋا قوجالىقتارىنىڭ وكىلدەرىمەن كەزدەسۋدەن كەيىن، نيدەرلاندىق كومپانيانىڭ وكىلدەرىمەن بىرگە يندۋستريالىق ايماقتا ينفراقۇرىلىمى دايىن جانە جاڭا ازىق-تۇلىك ءوندىرىسى سالىنۋى مۇمكىن يندۋستريالىق ايماقتاعى ۋچاسكەنى قاراپ شىقتى.
ساپاردىڭ سوڭىندا ۆيتسە-مينيستر جەتىسۋ وبلىسىنىڭ اكىمى بەيبىت يساباەۆپەن جانە «Farm Frites Kazakhstan» جشس باسشىسى يوزەف بوەرمەن كەزدەستى. تاراپتار قازاقستاندا كارتوپ يندۋسترياسىن دامىتۋ جونىندەگى جوسپارلارىن تالقىلاپ، زاۋىتتىڭ بولاشاقتا ورنالاساتىن جەرى تۋرالى شەشىمدەردى تالقىلادى.
جوبا جۇزەگە ءساتتى اسىرىلاتىن بولسا، وڭىرگە كوپ وندىرۋشىلەر قاجەت بولادى. وسىعان وراي 10 000 گەكتار القاپتا كارتوپ ءوسىرۋ بويىنشا فەرمەرلىك شارۋاشىلىقتىڭ قوسىمشا جوباسىن ىسكە اسىرۋ جوسپارلانىپ وتىر.
سونىمەن قاتار، ينۆەستيتسيالار تۋرالى كەلىسىم جاساسۋ مۇمكىندىگى قاراستىرىلۋدا، وندا بارلىق تاراپتاردىڭ الەۋمەتتىك-ەكونوميكالىق مىندەتتەمەلەرى رەتتەلەدى جانە «Farm Frites» كومپانياسىنىڭ بىرىكتىرىلگەن فري كارتوپ زاۋىتىن سالۋ كەزىندە مەملەكەتتىك قولداۋ شارالارى ناقتى بەلگىلەنەدى.
«Farm Frites» (Farm Frites Beheer B. V.) كومپانياسىنىڭ وكىلدەرى 5 جىلدان استام ۋاقىت بويى قازاقستاننىڭ بىرقاتار وڭىرىندە كارتوپ پەن كارتوپ تۇقىمىن تاجىريبە رەتىندە وتىرعىزىپ كەلەدى. ولار جوعارى ساپاداعى جانە زاۋىتتىڭ قاجەتتىلىكتەرى ءۇشىن قاجەتتى كولەمدەگى كارتوپتى جەتكىزۋدى، سونداي-اق جەرگىلىكتى فەرمەرلەردى وقىتۋدى كوزدەپ وتىر.
ايتا كەتەيىك، «Farm Frites» كومپانياسى 1971 جىلى نيدەرلاندىدا وتباسىلىق كاسىپورىن رەتىندە قۇرىلدى. نەگىزگى قىزمەتى - كارتوپتان مۇزداتىلعان جانە سالقىنداتىلعان ونىمدەر وندىرۋمەن اينالىسادى. كومپانيانىڭ الەمنىڭ 40 ەلىندە 6 زاۋىتى مەن 40 ساتۋ كەڭسەسى بار، وندا بارلىعى 1500 قىزمەتكەر جۇمىس ىستەيدى. كومپانيانىڭ كارتوپتى وڭدەۋ كولەمى جىلىنا 1,3 ملن تونناعا جەتەدى، ءونىم الەمنىڭ 80-نەن استام ەلىنە ەكسپورتتالادى. «Farm Frites» - الەم بويىنشا فري ءوندىرىسى بويىنشا ءتورتىنشى ورىندا تۇرعان جانە McDonalds, KFC جانە باسقا دا فاست-فۋد مەيرامحانالارىنىڭ نەگىزگى حالىقارالىق جەتكىزۋشىلەرىنىڭ ءبىرى.
