«تەڭىزشەۆرويل» جشس بولاشاق كەڭەيتۋ جوباسىنان 8,9 مىڭ قىزمەتكەر جۇمىستان بوساتىلادى.
بۇل تۋرالى ءماجىلىس دەپۋتاتتارىنىڭ ساۋالىنا قر پرەمەر-ءمينيسترى ءاليحان سمايىلوۆتىڭ جاۋابىندا ايتىلعان.
«وسى جىلدىڭ 6 ايىندا «تەڭىزشەۆرويل» جشس بولاشاق كەڭەيتۋ جوباسىنان 7,6 مىڭ قىزمەتكەر جۇمىستان بوساتىلدى. ونىڭ ىشىندە تشو ىشىندە – 1,1 مىڭ ادام، سونداي-اق باسقا دا ۇقساس كاسىپورىندارعا – 332 ادام، بوس جۇمىس ورىندارىنا – 354 ادام جۇمىسقا ورنالاستىرىلدى. 645 ادام جۇمىسىنان ايىرىلۋ بويىنشا جاردەماقى الۋدا. 888 ادام حالىقتى جۇمىسپەن قامتۋ ورتالىعىندا ەسەپتە تۇر جانە 4,3 مىڭ بۇرىنعى قىزمەتكەرلەرمەن ءتۇسىندىرۋ جۇمىستارى جۇرگىزىلۋدە. بۇعان قوسا، بيىل شىلدە ايىنان قىركۇيەك ايىنا دەيىن تاعى 8,9 مىڭ قىزمەتكەردى بوساتۋ جوسپارلانۋدا. ونىڭ ىشىندە تشو-عا 941 ادامدى جۇمىسقا ورنالاستىرۋ كوزدەلگەن»، - دەدى ۇكىمەت باسشىسى جاۋابىندا.
جول كارتاسىنا سايكەس جۇمىستان بوساتىلاتىن جۇمىسكەرلەردىڭ ءبىر بولىگى ۇقساس كاسىپورىندارعا اۋىستىرىلاتىن بولادى.
سونداي-اق ولارعا كاسىپتىك باعدار بەرۋدى جۇرگىزۋدى، كاسىپكەرلىككە ىنتالاندىرۋدى جانە مەملەكەت سۋبسيديالايتىن جۇمىس ورىندارىن ۇيىمداستىرۋدى، سونداي-اق قىسقا مەرزىمدى وقىتۋدى قوسا العاندا، حالىقتى جۇمىسپەن قامتۋ ورتالىعى ارقىلى جۇمىسقا ورنالاستىرۋ بويىنشا جاردەم كورسەتىلەدى.
«الايدا، جوعارى بىلىكتى قىزمەتكەرلەر قاتارىنداعى جۇمىستان بوساتىلعان قىزمەتكەرلەردىڭ قالعان بولىگى ولاردى ودان ءارى جۇمىسقا ورنالاسۋعا كومەك كورسەتۋدى قاجەت ەتپەيدى. قانداي دا ءبىر سالادا ۇلكەن كاسىبي جۇمىس تاجىريبەسى، ءبىلىمى جانە بىرەگەي داعدىلارى بار ادامدار ءوز بەتىنشە جۇمىسقا ورنالاسادى. وسىعان بايلانىستى، جۇمىستان بوساتىلاتىن قىزمەتكەرلەردى جۇمىسقا ورنالاستىرۋ ماقساتىندا ۇكىمەت جان-جاقتى كومەك كورسەتۋ جانە قامتۋ جانە حالىق اراسىندا جۇمىسسىزدىق دەڭگەيىنىڭ وسۋىنە جول بەرمەۋ جونىندە بارىنشا شارالار قابىلداۋدا»، - دەلىنگەن ءاليحان سمايىلوۆتىڭ رەسمي جاۋابىندا.
“ادىرنا” ۇلتتىق پورتالى
