«Teńizshevroıl» JShS bolashaq keńeıtý jobasynan 8,9 myń qyzmetker jumystan bosatylady.
Bul týraly Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan.
«Osy jyldyń 6 aıynda «Teńizshevroıl» JShS bolashaq keńeıtý jobasynan 7,6 myń qyzmetker jumystan bosatyldy. Onyń ishinde TShO ishinde – 1,1 myń adam, sondaı-aq basqa da uqsas kásiporyndarǵa – 332 adam, bos jumys oryndaryna – 354 adam jumysqa ornalastyryldy. 645 adam jumysynan aıyrylý boıynsha járdemaqy alýda. 888 adam Halyqty jumyspen qamtý ortalyǵynda esepte tur jáne 4,3 myń burynǵy qyzmetkerlermen túsindirý jumystary júrgizilýde. Buǵan qosa, bıyl shilde aıynan qyrkúıek aıyna deıin taǵy 8,9 myń qyzmetkerdi bosatý josparlanýda. Onyń ishinde TShO-ǵa 941 adamdy jumysqa ornalastyrý kózdelgen», - dedi Úkimet basshysy jaýabynda.
Jol kartasyna sáıkes jumystan bosatylatyn jumyskerlerdiń bir bóligi uqsas kásiporyndarǵa aýystyrylatyn bolady.
Sondaı-aq olarǵa kásiptik baǵdar berýdi júrgizýdi, kásipkerlikke yntalandyrýdy jáne memleket sýbsıdııalaıtyn jumys oryndaryn uıymdastyrýdy, sondaı-aq qysqa merzimdi oqytýdy qosa alǵanda, halyqty jumyspen qamtý ortalyǵy arqyly jumysqa ornalastyrý boıynsha járdem kórsetiledi.
«Alaıda, joǵary bilikti qyzmetkerler qataryndaǵy jumystan bosatylǵan qyzmetkerlerdiń qalǵan bóligi olardy odan ári jumysqa ornalasýǵa kómek kórsetýdi qajet etpeıdi. Qandaı da bir salada úlken kásibı jumys tájirıbesi, bilimi jáne biregeı daǵdylary bar adamdar óz betinshe jumysqa ornalasady. Osyǵan baılanysty, jumystan bosatylatyn qyzmetkerlerdi jumysqa ornalastyrý maqsatynda Úkimet jan-jaqty kómek kórsetý jáne qamtý jáne halyq arasynda jumyssyzdyq deńgeıiniń ósýine jol bermeý jóninde barynsha sharalar qabyldaýda», - delingen Álıhan Smaıylovtyń resmı jaýabynda.
“Adyrna” ulttyq portaly
