قازىر يراندا 132 قازاقستاندىق، ال يزرايلدە 219 قازاقستاندىق بار. بۇل تۋرالى بۇگىن، 16 ماۋسىمدا سىرتقى ىستەر مينيسترلىگىندە وتكەن بريفينگتە رەسمي وكىل ايبەك سمادياروۆ ايتتى، دەپ حابارلايدى «ادىرنا» ءتىلشىسى.
ول كونسۋلدىقتار ازاماتتارمەن تۇراقتى بايلانىستا ەكەنىن جانە قازا بولعاندار مەن جارالانعاندار اراسىندا قازاقستاندىقتاردىڭ جوق ەكەنىن مالىمدەدى.
ايتۋىنشا، ەكى ەل اراسىنداعى قاقتىعىستىڭ ۋشىعۋىنا بايلانىستى ءباا-دەن 300 وتانداسىمىز ۇيىنە قايتا الماي وتىر.
«قازىرگى تاڭدا كەيبىر اۋە كومپانيالارىنىڭ ءباا-دەن قازاقستانعا رەيستەرى توقتاۋىنا بايلانىستى قازاقستان رەسپۋبليكاسىنىڭ 300-گە جۋىق ازاماتىنىڭ ەلگە جەتۋى بويىنشا ۋاقىتشا قيىندىق تۋىپ وتىر. ولاردىڭ كوپشىلىگى —تۋريستەر. وقيعا ورنىندا ديپلوماتتارىمىز جۇمىس ىستەپ جاتىر. الداعى ۋاقىتتا اۋە كومپانيالارىمەن جاسالعان كەلىسىمنىڭ ارقاسىندا ازاماتتاردىڭ جارتىسىنان كوبى ەلگە ورالادى دەپ كۇتىلىپ وتىر»،— دەپ ءتۇسىندىردى ايبەك سمادياروۆ.
رەسمي وكىل يزرايل مەن يرانداعى قازاقستاندىقتارعا قاۋىپسىزدىك شارالارىن كۇشەيتۋگە كەڭەس بەردى.
«يزرايل مەن يرانداعى قازاقستاندىقتارعا تۇرعىلىقتى جەرلەرىن اسا قاجەتتىلىكسىز تاستاماۋعا، قاۋىپسىزدىك شارالارىن كۇشەيتۋگە، ساقتىق پەن قىراعىلىق تانىتۋعا، جاڭالىقتاردى باقىلاپ وتىرۋعا جانە جەرگىلىكتى بيلىك ورگاندارىنىڭ نۇسقاۋلارىن ساقتاۋعا كەڭەس بەرەمىز. سونىمەن قاتار سىرتقى ىستەر مينيسترلىگىمەن جانە قازاقستاننىڭ يران مەن يزرايلدەگى ەلشىلىكتەرىمەن بايلانىستا بولۋدى سۇرايمىز»،—دەدى ول.
