رەسەيدىڭ ەكاتەرينبۋرگ قالاسىندا وتكەن ارنايى وپەراتسيادان كەيىن ازەربايجان سىرتقى ىستەر مينيسترلىگى رەسەيدىڭ باكۋدەگى ۋاقىتشا سەنىمدى وكىلى پەتر ۆولوكوۆىحتى مينيسترلىككە شاقىردى. بۇل تۋرالى ۆەدومستۆو رەسمي مالىمدەمە تاراتتى، دەپ حابارلايدى "ادىرنا" ۇلتتىق پورتالى.
مالىمەتكە سايكەس، 27 ماۋسىم كۇنى رەسەي قۇقىق قورعاۋ ورگاندارى ەكاتەرينبۋرگتە ازەربايجان تۋمالارى تۇراتىن بىرنەشە پاتەرگە رەيد ۇيىمداستىرعان. ناتيجەسىندە ەكى ازامات – زياددين جانە گۋسەين سافاروۆ قازا تاۋىپ، بىرنەشە ادام اۋىر جارالانىپ، توعىز ادام تۇتقىندالعان.
ازەربايجان تاراپى بۇل ارەكەتتەردى «قاتىگەزدىكپەن جاسالعان كۇش قولدانۋ» دەپ باعالاپ، رەسەيلىك تاراپقا قاتاڭ نارازىلىق ءبىلدىردى.
رەسەيدىڭ تەرگەۋ ورگاندارى بولسا، رەيدتى 2001 جىلى ازەربايجان ازاماتى يۋنيس پاشاەۆتىڭ ولتىرىلۋىنە بايلانىستى قوزعالعان قىلمىستىق ءىس اياسىندا جۇرگىزىلگەنىن حابارلادى. تىنتۋلەر اگدامنان شىققان سافاروۆتار وتباسىنا قاتىستى جۇرگىزىلگەن.
سونداي-اق «باكۋ پلازا» ساۋدا ورتالىعىندا ءتىنتۋ جۇمىستارى بولعان. كەيبىر دەرەككوزدەر وڭىردەگى ازەربايجان دياسپوراسىنىڭ جەتەكشىسى شاحين شيحلينسكيدەن جاۋاپ الىنعانىن حابارلاعانىمەن، ول بۇل اقپاراتتى جوققا شىعاردى.
