اقش-تىڭ تەحاس شتاتىنداعى كەرر وكرۋگىندە بولعان جويقىن سۋ تاسقىنىنان 24 ادام قازا تاپتى. سونداي-اق، 20-دان استام بالا جوعالىپ كەتتى. ولار Camp Mystic جازعى لاگەرىندە دەمالىپ جاتقان، دەپ حابارلايدى "ادىرنا" ۇلتتىق پورتالى.
وقيعا سالدارىنان تەحاستىڭ بىرنەشە ايماعىندا توتەنشە جاعداي جاريالاندى. كوپتەگەن جولدار قيراپ، بايلانىس جۇيەلەرى ىستەن شىققان. قۇتقارۋ قىزمەتىنىڭ مالىمەتىنشە، قازىرگى ۋاقىتتا 237 ادام قاۋىپسىز جەرگە ەۆاكۋاتسيالانعان.
قۇتقارۋشىلار جوعالعان بالالاردى ىزدەۋدى جالعاستىرىپ جاتىر. ىزدەۋ جۇمىستارىنا تىكۇشاقتار، دروندار جانە قايىقتار تارتىلعان. بيلىك بارلىق جوعالعان ادام تابىلعانشا جۇمىس توقتامايتىنىن مالىمدەدى.
گۋادالۋپە وزەنىنىڭ دەڭگەيى نەبارى 45 مينۋت ىشىندە 8 مەترگە كوتەرىلگەن. كوپ مولشەردە جاۋعان جاڭبىر وزەن ماڭىنداعى جىلجىمالى ۇيلەردى، كولىكتەردى جانە دەمالىس ۇيلەرىن شايىپ كەتكەن.
گۋبەرناتور گرەگ ەببوتت توتەنشە جاعداي تۋرالى جارلىققا قول قويىپ، بارلىق رەسۋرستاردى قۇتقارۋشىلاردىڭ يەلىگىنە بەردى. شتات بويىنشا 4 شىلدەگە جوسپارلانعان تاۋەلسىزدىك كۇنىنە ارنالعان بارلىق شارالار توقتاتىلدى.
اقش پرەزيدەنتى دونالد ترامپ بۇل وقيعانى «شوك تۋعىزاتىن جانە قورقىنىشتى» دەپ باعالاپ، اق ءۇي تەحاسقا قوسىمشا كومەك كورسەتەتىنىن مالىمدەدى.
كەرر وكرۋگىنىڭ شەنەۋنىگى روب كەلليدىڭ ايتۋىنشا، بۇل ايماقتا سۋ تاسقىنىنا ەسكەرتۋ جۇيەسى جوق بولعاندىقتان، تۇرعىندار الدىن الا ەۆاكۋاتسيالانباعان. ول بۇل تاسقىن 1987 جىلى بولعان سۋ اپاتىنان دا اسىپ تۇسكەنىن ايتتى. سول جىلى شىركەۋ لاگەرىندەگى اۆتوبۋس ىشىندە 10 ءجاسوسپىرىم قازا تاپقان ەدى.
مەتەورولوگتاردىڭ الدىن الا بولجامىنا سايكەس، بۇل جولى 20 سم جاۋىن-شاشىن كۇتىلگەن، بىراق جاۋىن مولشەرى الدەقايدا كوپ بولعان. جەرگىلىكتى بيلىك تۇرعىنداردى وزەن مەن سۋ قويمالارى ماڭىنان بيىك ايماقتارعا كوشۋگە شاقىرۋدا.
