قازاقستاندا اتا-انالار مىندەتتى مەكتەپ فورماسىن الىپ تاستاۋ تۋرالى پەتيتسياعا قول جيناۋدى باستادى، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
باستاماشىلاردىڭ ايتۋىنشا، بۇعان سەبەپ - فورما باعاسىنىڭ جىل سايىن قىمباتتاۋى.
ولاردىڭ پىكىرىنشە، بالانىڭ ۇلگەرىمى ونىڭ كيگەن كيىمىنە بايلانىستى ەمەس، سوندىقتان وقۋشىلارعا ءوز قالاۋىنداعى كيىممەن مەكتەپكە بارۋعا ەركىندىك بەرىلۋى ءتيىس.
ساۋداگەرلەردىڭ دەرەگىنشە، مەكتەپ فورماسىنىڭ باعاسى جىل سايىن شامامەن 10–15% وسەدى. بىرقاتار جەكەمەنشىك مەكتەپتەر ءوز فورماسىن ەنگىزگەنىمەن، مەملەكەتتىك مەكتەپتەردە بىرىڭعاي ۇلگى ساقتالىپ وتىر.
وقۋ-اعارتۋ مينيسترلىگى مىندەتتى مەكتەپ فورماسىن قولداپ وتىر. ۆەدومستۆو وكىلى مەرەكە امانگەلدىقىزىنىڭ سوزىنشە، بىركەلكى كيىم وقۋ ورنىندا ءتارتىپ پەن ىسكەرلىك اتموسفەرانى قالىپتاستىرادى، وقۋشىلاردىڭ نازارىن ءبىلىم الۋعا اۋدارادى جانە الەۋمەتتىك تەڭدىكتى نىعايتادى. بۇل بۋللينگ پەن سانگە بايلانىستى قىسىمنىڭ الدىن الۋعا دا ىقپال ەتەدى.
زاڭناماعا سايكەس، مەكتەپ فورماسى كلاسسيكالىق ۇلگىدە جانە بىرىڭعاي تۇستە بولۋى كەرەك. ەگەر پەتيتسيا قاجەتتى قول جيناسا، قۇزىرلى ورگاندار ونى قاراۋعا مىندەتتى. دەگەنمەن، بيىلعى وقۋ جىلىندا قازاقستاندا مەكتەپ وقۋشىلارى مىندەتتى فورمانى كيەتىن بولادى.
