بيىل قازاق حالقىنىڭ ۇلى كومپوزيتورى، ديريجەر، كۇيشى، قازاقستاننىڭ حالىق ءارتىسى نۇرعيسا تىلەنديەۆتىڭ تۋعانىنا 110 جىل تولىپ وتىر. بۇل مەرەيتوي – تەك ءبىر تۇلعانىڭ عانا ەمەس، تۇتاس ۇلتتىق ونەرىمىزدىڭ، مادەنيەتىمىزدىڭ مەرەكەسى. ونىڭ شىعارماشىلىعى قازاق مۋزىكاسىن جاڭا بەلەسكە كوتەرىپ، حالىقتىڭ رۋحاني قازىناسىنا اينالدى.
نۇرعيسا تىلەنديەۆ 1925 جىلى الماتى وبلىسى، ىلە اۋدانىنىڭ شيلىكەمەر اۋىلىندا دۇنيەگە كەلگەن. جاستايىنان مۋزىكاعا قۇشتار بولىپ وسكەن ول قۇرمانعازى اتىنداعى الماتى مەملەكەتتىك كونسەرۆاتورياسىندا ءبىلىم الىپ، كاسىبي جولىن باستادى.
تىلەنديەۆتىڭ قالدىرعان مۇراسى – قازاق ونەرىنىڭ التىن قازىناسى. ول جۇزدەن استام ءان مەن كۇيدىڭ اۆتورى. حالىق اراسىندا كەڭىنەن تارالعان «القيسسا»، «اققۋ»، «ماحامبەت»، «الاتاۋ» سياقتى كۇيلەرى، سونداي-اق ء«وز ەلىم»، «اتا تولعاۋى»، «سارجايلاۋ» اندەرى ۇلتتىق رۋحتى اسقاقتاتادى.
سونىمەن قاتار، نۇرعيسا تىلەنديەۆ كينو ونەرىنە دە زور ۇلەس قوستى. ول «قىز جىبەك»، «مەنىڭ اتىم قوجا»، «اتامەكەن» سەكىلدى فيلمدەرگە مۋزىكا جازىپ، قازاق كينەماتوگرافياسىنىڭ كوركەمدىك دەڭگەيىن بيىكتەتتى.
1982 جىلى نۇرعيسا تىلەنديەۆتىڭ باستاماسىمەن «وتىرار سازى» حالىق اسپاپتار وركەسترى قۇرىلدى. بۇل وركەستر قازاقتىڭ ءداستۇرلى اسپاپتارىن جاڭا سيپاتتا دامىتىپ، حالىقتىق اۋەندى كاسىبي دەڭگەيگە كوتەردى. بۇگىندە «وتىرار سازى» – قازاق مۋزىكاسىنىڭ سيمۆولىنا اينالعان ۇجىم.
نۇرعيسا تىلەنديەۆ شىعارماشىلىعى – ۇرپاققا رۋحاني تاربيە بەرەتىن ۇلكەن مەكتەپ. ونىڭ كۇيلەرى مەن اندەرى ارقىلى جاستار ەلىن، جەرىن سۇيۋگە، تاريحىن قادىرلەۋگە ۇيرەنەدى. سوندىقتان 110 جىلدىق مەرەيتويىن اتاپ ءوتۋ – ۇلتتىق بىرلىكتى نىعايتىپ، جاس بۋىنعا ۇلگى كورسەتۋدىڭ ماڭىزدى جولى. بۇل مەرەيتوي اياسىندا ونىڭ شىعارمالارىن ناسيحاتتاۋ، كونتسەرتتەر ۇيىمداستىرۋ، عىلىمي ماقالالار مەن زەرتتەۋلەر شىعارۋ – بولاشاق ۇرپاق الدىنداعى پارىزىمىز.
ۇقساس جاڭالىقتار
