قازاقستاندىق «قايرات» فۋتبول كومانداسى چەمپيوندار ليگاسىنىڭ سوڭعى ىرىكتەۋ ماتچىنىڭ پلەي-وفف كەزەڭىندە شوتلانديالىق «سەلتيكتى» جەڭىپ، كەلەسى كەزەڭگە جولداما الدى، دەپ حابارلايدى "ادىرنا" ۇلتتىق پورتالى.
كوماندالار ىرىكتەۋ كەزەڭىنىڭ پلەي-وفف راۋندىندا باق سىنادى. الماتىداعى ورتالىق ستاديوندا وتكەن ويىننىڭ نەگىزگى ۋاقىتى 0:0 ەسەبىمەن اياقتالدى. رەگلامەنتكە سايكەس قوسىمشا ۋاقىت تاعايىندالدى.
قوسىمشا ەكى تايمدا دا گول سوعىلمادى.
جەڭىمپازدى انىقتاۋ ءۇشىن پەنالتي سەرياسى وتكىزىلدى. «سەلتيك» ويىنشىلارىنىڭ العاشقى ەكى سوققىسىن قازاقستان قۇراماسىنىڭ قاقپاشىسى تەمىرلان اناربەكوۆ قايتاردى. ال الاڭ يەلەرىنىڭ جارتىلاي قورعاۋشىسى ۆالەري گرومىكو دوپتى قاقپاعا باعىتتاي الماي، كولدەنەڭ باعاناعا تيگىزدى.
ودان كەيىن الماتىلىقتاردىڭ ساپىنان ءۇش قورعاۋشى – الەكساندر مارتىنوۆيچ، وفري اراد جانە ەگور سوروكين ءدال سوققى جاسادى. ءۇشىنشى سەيۆتەن كەيىن اناربەكوۆ كومانداسىنا 3:2 ەسەبىمەن جەڭىس سىيلادى.
«قايرات» تاريحىندا العاش رەت چەمپيوندار ليگاسىنىڭ نەگىزگى كەزەڭىنە جولداما الدى. بۇعان دەيىن قازاقستاندىق كوماندالاردان تەك «استانا» 2015/16 ماۋسىمىندا توپتىق كەزەڭگە شىققان ەدى.
بيىل چەمپيوندار ليگاسى ەكىنشى جىل قاتارىنان 36 كوماندادان تۇراتىن بىرىڭعاي كەزەڭمەن ۇيىمداستىرىلادى. ءار كلۋب سەگىز ماتچ وتكىزەدى — تورتەۋى ءوز الاڭىندا، تورتەۋى سىرت الاڭدا. «قايرات» قارسىلاستارىن انىقتايتىن جەرەبە 28 تامىزدا وتەدى.
