الماتىدا شاحماتتان كادەتتەر (بالالار) اراسىنداعى الەم چەمپيوناتى باستالدى. 2025 جىلعى 19–30 قىركۇيەك ارالىعىندا وتەتىن تۋرنيردە U8, U10 جانە U12 جاس ساناتتارىنداعى بالالار باق سىنايدى. بۇل تۋرالى قازاقستان شاحمات فەدەراتسياسى جازدى، دەپ حابارلايدى "ادىرنا".
چەمپيوناتقا 88 ەلدەن 850-دەن استام جاس شاحماتشى تىركەلگەن. قازاقستان چەمپيونات يەسى رەتىندە 200-دەن استام ويىنشى شىعارعان. ءۇندىستان (28), قىتاي (25) جانە اقش (24) سىندى شاحمات دەرجاۆالارىنان دا قاتىسۋشىلار بار.
فيدە پرەزيدەنتى اركادي دۆوركوۆيچتىڭ ايتۋىنشا، قازاقستانداعى تۋرنير وزىندىك رەكورد ورناتىپ تۇر.
«كادەتتەر اراسىنداعى تۋرنير جىل سايىن وتكىزىلەدى. قازاقستانداعى ءتۋرنيردىڭ باستى ەرەكشەلىگى قاتىسۋشى مەملەكەتتەردىڭ سانى بولىپ وتىر. 88 ەلدىڭ فەدەراتسياسى ءوز دەليگاتسياسىن جىبەرىپ وتىر. قازاقستاننىڭ وزىنەن عانا 200-دەن استام بالا تىركەلگەن. بۇل ەلدەگى شاحماتتىڭ دامۋى دەڭگەيىن، ونىڭ بولاشاعى جارقىن ەكەنىن انىق كورسەتەدى. بۇل تۇرعىدان العاندا، باسقا ەلدەر قازاقستاننان ۇلگى الۋى ءتيىس»، – دەدى اركادي دۆوركوۆيچ.
قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆتىڭ ايتۋىنشا، ءتۋرنيردىڭ قازاقستاندا ءوتۋى ءبىزدىڭ جاس سپورتشىلار ءۇشىن جانە جالپى قازاقستان شاحمات مەكتەبى ءۇشىن اسا ماڭىزدى. سەبەبى الەمدەگى ۇزدىك سپورتشىلارمەن ويناۋ ءبىزدىڭ كادەتتەرگە جاقسى تاجىريبە بولماق.
«ەشبىر شاحمات ءتۋرنيرى، ءتىپتى ەلىمىزدەگى وزگە سپورتتىق شارالاردىڭ ەشقايسىسى دا مۇنداي اۋقىمدى قاتىسۋشىلار قۇرامىن جيناماعان. بۇل – قازاقستاندىق شاحمات پەن تۇتاس ەلىمىز ءۇشىن تاريحي ءسات. ءبىز قوناقتاردى تەك قوناقجاي رەتىندە عانا ەمەس، سونىمەن قاتار الەمنىڭ ەڭ مىقتى شاحمات دەرجاۆالارىنىڭ ءبىرى ءارى ءتۋرنيردىڭ باستى ءفاۆوريتى مارتەبەسىندە قارسى الىپ وتىرمىز»، – دەدى تيمۋر تۋرلوۆ.
ءتۋرنيردىڭ باستى فاۆوريتتەرىنىڭ ءبىرى قازاقستاندىق سپورتشى دياس قۋاندىقۇلى ءتۋرنيردىڭ قازاقستاندا ءوتىپ جاتقانىنا قۋانىشتى ەكەنىن ايتادى. ول 2023 جىلى ءدال وسى تۋرنيردە 10 جاسقا دەيىنگى بالالار اراسىندا الەم چەمپيونى بولعان. بيىل 12 جاسقا دەيىنگى شاحماتشىلار قاتارىندا ونەر كورسەتەدى.
«تۋرنيردە جاقسى ونەر كورسەتۋگە تىرىسامىن. باق شابا ما، باپ شابا ما كورەمىز. ءبارى سپورتشىلاردىڭ دايىندىعىنا بايلانىستى عوي. مۇنداعى كوپتەگەن سپورتشىلارمەن بۇرىن كەزدەسىپ، ويناپ كورگەنمىن. ۇزدىك ويىنشىلار جينالدى دەپ سەنىمدى تۇردە ايتا الامىن. جاقسى ويىن كورسەتۋگە بارىمدى سالاتىن بولامىن»، – دەدى دياس قۋاندىقۇلى.
بۇعان دەيىن قازاقستاندا شاحماتتان ەڭ جوعارى دەڭگەيدەگى حالىقارالىق جارىستاردىڭ، سونىڭ ىشىندە الەم چەمپيوناتتارى مەن ەرلەر اراسىنداعى الەم چەمپيونى اتاعى ءۇشىن ماتچ تا وتكىزىلدى.
2024 جىلى يتاليانىڭ مونتەسيلۆانو قالاسىندا وتكەن الەم چەمپيوناتىنا 77 ەلدەن 700-دەن استام جاس شاحماتشى قاتىسقان.
اشىلۋ راسىمىنەن كەيىن بىردەن 1-ءشى تۋر باستالدى. جالپى 19–30 قىركۇيەك ارالىعىندا شۆەيتسار جۇيەسى بويىنشا 11 تۋر وتەدى. ۋاقىتتى باقىلاۋ – 90+30 فورماتى ء(ار پارتياعا 90 مينۋت جانە العاشقى جۇرىستەن باستاپ ءار قادامعا 30 سەكۋند قوسىلادى).
11 تۋردىڭ قورىتىندىسى بويىنشا الەم چەمپيوندارى، كۇمىس جانە قولا جۇلدەگەرلەر انىقتالادى. جارىس ۇلدار (Open) مەن قىزدار (Girls) اراسىندا التى جاس ساناتىندا ءوتىپ جاتىر: O8, G8, O10, G10, O12 جانە G12.
