الماتىداعى ورتالىق ستاديوندا UEFA چەمپيوندار ليگاسىنىڭ توپتىق كەزەڭىندەگى كوپتەن كۇتكەن كەزدەسۋ ءوتتى، دەپ حابارلايدى "ادىرنا" ۇلتتىق پورتالى.
«قايرات» پەن ەۋروپانىڭ ەڭ مىقتى كلۋبتارىنىڭ ءبىرى «رەال مادريد» اراسىنداعى ماتچ فۋتبول جانكۇيەرلەرىنىڭ نازارىن وزىنە اۋدارتتى.
ويىننىڭ العاشقى مينۋتتارىنان-اق مادريدتىك كوماندا ويىن تىزگىنىن ءوز قولىنا الدى. 25-مينۋتتا كيليان مباپپە پەنالتيدەن ەسەپ اشىپ، «رەالدى» العا شىعاردى. ارتىنشا ونىڭ شاپشاڭدىعى مەن شابۋىلداعى بەلسەندىلىگى قازاقستاندىق كوماندانىڭ قورعانىسىن قىسپاققا الدى. مباپپە تاعى ەكى رەت مەرگەندىگىمەن كوزگە ءتۇسىپ، حەت-تريك اۆتورى اتاندى.
70-مينۋتتا رودريگو ءتورتىنشى گولدى ەنگىزسە، ماتچ سوڭىندا برايم دياس بەسىنشى دوپتى سوعىپ، قورىتىندى نۇكتە قويدى.
"قايرات" كومانداسىنىڭ قاقپاشىسى 18 جاستاعى شەرحان قالمىرزانىڭ بىرقانشا قاتەردىڭ الدىن بوگەپ، دوپتى قاققانى كورەرمەندەر نازارىن اۋدارتتى. شەرحان بەلگىلى دەگەن ويىنشىلاردىڭ بىرقانشا دوبىن قاقپاعا وتكىزبەي ۇستاپ قالدى. ويىننان كەيىن الەۋمەتتىك جەلىدە وعان قولداۋ بىلدىرگەن جازبالار كوپتەپ ۇشىراستى.
قولدانۋشىلاردىڭ ءبىرى “رەال مادريد” پەن شەرحان جالعىز ويناعانداي بولدى ماعان", - دەپ جازسا، تاعى ءبىرى "شەرحان شەرى... جاقسى جاتتىقتىرۋشى بولسا، ءبىراز جاعداي جاسالسا مىقتى قاقپاشى بولعالى-اق تۇر ەكەن... كەشەگى ويىننان كەيىن ەۋروپانىڭ كوماندالارىنىڭ ءبىرى بولماسا ءبىرى "قۇدا تۇسسە" جۇلدىزى جارقىراپ كەتەر مە ەدى!؟"- دەگەن جازبا قالدىرعان.
ال "رەال" كومانداسىنىڭ كاپيتانى تيبو كۋرتۋا ءوزىنىڭ جازباسىندا شەرحاندى بەلگىلەپ، "قايراتپەن" بولعان ويىن تۋرالى ويىمەن بولىسكەن. ول "ۇلكەن جەڭىسكە جەتۋ جولىنداعى وتە سەنىمدى ويىن. الەمدەگى ۇزدىك كلۋبتىڭ كاپيتانى رەتىندە الاڭعا شىعۋ ادامدى تولقىتادى", - دەپ ول ءوزىنىڭ اسەرىن جازعان.
ويىن سوڭىندا تيبو مەن شەرحاننىڭ جەيدە الماستىرعانى دا الەۋمەتتىك جەلىدە تالقىلانىپ جاتىر.
الماتى ستاديونىنىڭ ءىشى-سىرتى كورەرمەنگە لىقا تولدى. بىرنەشە كۇن بۇرىن قازاقستاننىڭ بۇرىنعى باسشىسى نۇرسۇلتان نازارباەۆ تا اۋلەتىمەن وسى ويىندى تاماشالايتىنى ايتىلعان. الايدا ويىن كەزىندە الەۋمەتتىك جەلىدەگى كەيبىر پاراقشالاردا ەكس-پرەزيدەنتتىڭ كەلگەنى حابارلانعانىمەن، مالىمەت راستالمادى.
