سونىڭ بىرەگەيى – «تۇركىستان تەكستيل» جشس قولعا العان ماڭدايالدى ماقتا-ماتا كلاستەرى. جوبانىڭ قۇرىلىس بارىسىمەن وبلىس اكىمى نۇرالحان كوشەروۆ ارنايى بارىپ تانىستى. ءوڭىر باسشىسى كلاستەردىڭ ەكونوميكالىق ءمان-ماڭىزىن اتاپ ءوتىپ، ساپالى ءارى جەدەل ىسكە اسىرۋدى تاپسىردى.
بۇل ەلىمىزدەگى ەڭ ءىرى توقىما كلاستەرلەرىنىڭ ءبىرى بولماق. جالپى قۇنى 86,5 ملرد تەڭگەنى قۇرايتىن ءوندىرىس كەشەنىندە 2345 ادام تۇراقتى جۇمىسپەن قامتىلادى. ءوز شيكىزاتىنا نەگىزدەلگەن ىشكى ءوندىرىس تىزبەگى قالىپتاسادى جانە ەكسپورتقا باعىتتالعان دايىن ونىمدەر شىعارىلادى. جەرگىلىكتى ماقتا وندىرۋشىلەر ءۇشىن تۇراقتى وتكىزۋ نارىعى پايدا بولادى.
– ءبىز شيكىزاتتى تەك ءوسىرىپ قانا قويماي، ونى تولىق وڭدەپ، قوسىلعان قۇنى جوعارى ونىمگە اينالدىرۋىمىز قاجەت. بۇل - پرەزيدەنت تاپسىرماسى. تۇركىستان وبلىسى ماقتا ەگەتىن جالعىز ءوڭىر. ەندەشە، توقىما كلاستەرى وسى سالانىڭ بولاشاعىن انىقتايتىن ماڭىزدى تەتىك بولادى. ءبىز بۇل جوبانى ءجىتى باقىلاۋدا ۇستايمىز، – دەدى وبلىس اكىمى نۇرالحان كوشەروۆ.
«Turkistan Textile» جوباسى تولىق وندىرىستىك تسيكلگە نەگىزدەلگەن. ياعني، جوبا اياسىندا ەليتالىق سۇرىپتى ماقتا تۇقىمىن جەرگىلىكتى جەردە ءوسىرۋ، ءجىپ ءيىرۋ، ماتا توقۋ، كيىم تىگۋ جانە دايىن ءونىم ءوندىرۋ مەن ىشكى نارىق پەن ەكسپورتقا شىعارۋ كوزدەلگەن. بۇنداي جۇيە ءوڭىردىڭ اۋىل شارۋاشىلىعى مەن جەڭىل ونەركاسىبىن توعىستىرىپ، ماكروەكونوميكالىق كورسەتكىشتەردى جاقسارتۋعا ىقپال ەتەدى. بۇل ءوز كەزەگىندە وبلىستىڭ ءىجو-ءسىنىڭ وسۋىنە، سالىق بازاسىنىڭ كەڭەيۋىنە جانە جۇمىسسىزدىقتىڭ تومەندەۋىنە مۇمكىندىك بەرەدى.
قازىرگى تاڭدا وندىرىستىك كورپۋستار مەن جۇمىسشىلارعا ارنالعان جاتاقحانا قۇرىلىسى اياقتالۋعا جاقىن. ءبىرىنشى كەزەڭنىڭ ءوندىرىسىن بيىل ىسكە قوسۋ جوسپارلانعان. قالعانى كەلەر جىلدىڭ سوڭىنا دەيىن كەزەڭ-كەزەڭىمەن پايدالانۋعا بەرىلەدى. بۇل جوبانى قىتايلىق «Lihua Group» كومپانياسى قارجىلاندىرىپ وتىر.
ۇقساس جاڭالىقتار
